La Hanneli-Musig è ina chapella extraordinaria. Però esser en gir dapi 320 onns, quai fiss in pau bler! Dapli da questa cifra vegnis Vus a savair en l'Artg musical da questa dumengia.
Cumenzà ha l'istorgia da success da la Hanneli-Musig il 2002. Quest onn datti ils ultims concerts da la turnea da cumià, e tschintg anniversaris radunds da ses musicants. 80, 70, 60, 60 e 50.
Las ragischs èn tar Hanny Christen. Ella ha vivì dal 1899 fin il 1976 ed ha ramassà in grond stgazi da musica populara, sauts che fissan forsa ids a perder. A partir dal 1940 ha ella notà millis da melodias, ed il 1963 ha ella surdà sia collecziun a la biblioteca da l'Universitad da Basilea – e là è quella restada 30 onns.
Il 1992 chatta il musicant e cumponist Fabian Müller per cas il relasch da Hanny Christen. Ils 12'000 sauts vegnan sortids, cataloghisads – ed il 2002 vegn publitgada la collecziun da la chasa editura Mülirad.
Nova vita per sauts emblidads
Suenter la publicaziun è l'interess da chapellas e da furmaziuns grond. Ellas cumenzan a sunar quels sauts. La pli impurtanta è la Hanneli-Musig, fundada il 2002 aposta per far reviver las melodias veglias. Ils musicants da vaglia Dani Häusler, Fränggi Gehrig (fin il 2008 Markus Flückiger), Ueli Mooser, Peter Gisler (fin il 2018 Christoph Mächler), Fabian Müller e Johannes Schmid-Kunz han registrà otg discs cun sauts da tut la Svizra, han fatg tschients concerts ed han procurà ch'ils sauts da la collecziun da Hanny Christen na restian betg be en ils truclets.
