Eligius Tambornino valeva avant bun 10 onns sco in dals megliers sprinters svizzers da passlung en la tecnica libra, il skating. En questa disciplina è el daventà campiun svizzer, è stà classà pliras giadas en ils top 10 da la cuppa mundiala ed ha dastgà sa participar a campiunadis mundials ed a gieus olimpics.
Il 2014, suenter ils gieus olimpics a Sotschi ch'èn ids a fin cun ina gronda dischillusiun, è Tambornino sa decidì da lantschar ina nova carriera en il biatlon. Durant otg onns ha el lavurà cun corp ed olma per il success en il sport da biatlon. Propi fitgar pe en la cuppa mundiala n'ha il sportist da Trun però mai pudì, principalmain pervia dal sajettar sin pes.
Oz na stat betg pli il sport, mabain la famiglia en il focus
Enstagl da la loipa ed il stan da tir è oz la stanza da scola la plazza da lavur dad Eligius Tambornino. Dapi l'onn passà dat el scola primara a Danis. Anc durant la carriera sco biatlet ha el frequentà la scol'auta da pedagogia a Cuira.
«Sco en il sport èsi era magari da morder sco scolast, ma jau emprov da far mes meglier pussibel sco quai chjau hai fatg tut ils onns sco passlunghist u biatlet.»
Il temp liber passenta el il pli gugent cun sia famiglia. Ma er il moviment na dastga betg mancar. Uschia ha Eligius Tambornino cumenzà a far cursas da currer sur distanzas lungas, cursas da trailrunning. Per l'onn proxim è el gia s'annunzià per l'Eiger Ultra Trail, ina cursa sur ina distanza da 101 kilometers cun 6'700 meters differenza d'autezza.
E betg mancar en la vita da l'anteriur profi da sport dastga la musica. Dapi passa 20 onns è Eligius Tambornino commember da la societad da musica Trun.
