Il papa è omnipreschent als Dis mundials da la giuventetgna. El vegn venerà, gea adurà. Fundà l'onn 1986 da papa Gion Paul II, è il Di mundial da la giuventetgna er oz anc collià stretgamain cun il pontifex. Igl è la pli gronda festa catolica da la giuventetgna en tut il mund. Quatter milliuns participantas e participants ha dumbrà l'inscunter il 1995 a Manila – in record.
Er a Cuira ha lieu quest onn in Di mundial da la giuventetgna, numnadamain dals 3 enfin ils 5 da matg. Igl è l'ediziun regiunala ch'è mintg'onn en in auter lieu en Svizra tudestga. Mintga trais onns ha lieu in Di mundial da la giuventetgna naziunal, e mintga dus u trais onns envida il papa ad in inscunter internaziunal. L'ultima giada l'onn passà a Lissabon.
Tar ils puncts culminants dals Dis mundials da la giuventetgna tutgan catechesas, discussiuns, lavuratoris e concerts – ed a chaschun dals Dis internaziunals la scuntrada cun il papa. Alura celebreschan tuts e tuttas communablamain ina vigilgia ed in servetsch divin final.
Sumegliant, ma pli pitschen, vegn il program ad esser al Di mundial da la giuventetgna a Cuira. Tge e co ch'ils giuvenils vegnan a festivar a Cuira, pertge che la cuminanza è uschè impurtanta per la giuvna glieud cristifidaivla e co che ina tala festa sa lascha giustifitgar en temps da la midada dal clima, da quai rapporta Vita e cretta.
