Dapi l’onn 1993 emetta RTR di per di in nov Impuls, in’istorgia, in patratg per entschaiver il di. Auturas ed auturs rumantschs scrivan e prelegian qua istorgias vairas u bain inventadas. Er grazia a quest’emissiun è la scena da litteratura rumantscha oz viva e vasta sco anc mai.
Per festivar il giubileum ha RTR envidà en venderdi, ils 25 d’avust ad in segund aperitiv litterar en chasa RTR a Cuira. L'autur engiadinais Dumenic Andry, l'autura surmirana Zegna Pittet-Dosch e l'autura Myriam Pelican che scriva en rumantsch da Domat, han prelegì impuls novs e vegls che han sco punct da partenza muments, observaziuns ed inscunters che sa dattan en lur mintgadi. Romana Ganzoni ha procurà per in impuls festiv per la festa dals Impuls e Flurina Badel ha manà il public tras la saira.
La forza da la banalitad
Zegna Pittet-Dosch, Dumenic Andry e Myriam Pelican scrivan tuts trais gia dapi blers onns per l'emissiun Impuls. En quest temp è il scriver daventà per els ina chaussa indispensabla er per reflectar lur mintgadi. A Dumenic Andry dattan regurdanzas vi da muments particulars en sia uffanza adina puspè l'impuls per scriver impuls. Quest regords transfurma el en texts litterars autofictivs. Myriam Pelican dentant scriva impuls davart ses mintgadi actual sco perditgas dal temp e conservescha uschia muments che commovan ad ella. Per Zegna Pittet-Dosch è la pointa divertenta ordvart impurtanta en in impuls, perquai ramassa ella muments in ses mintgadi cun potential umoristic e tils scriva si per tils parter cun in public.
Temma da scriver insatge banal n'ha han tut las/ils trais auturs*as betg – els van perina ch'è in toc turta sa mintgatant gidar dapli co milla pleds sabis.
11'000 Impuls en 30 onns
Ils Impuls dal Radio Rumantsch èn cult! Ils 29 d'october 1993 a las 6:30 è l'emprim Impuls ì sur l'emettur dal Radio Rumantsch en l'emissiun da la damaun, numnada BunaLuna. Ils davos 30 onns han var 150 auturas ed auturs prelegì di per di patratgs ed istorgias curtas ord lur mintgadi u lur fantasia. Texts leghers, poetics, trists, experimentals, meditativs, critics e savens da tempra persunala. Cun l'ir dals onns èn ils Impuls quasi daventads in agen gener litterar rumantsch, e la rubrica ha survegnì ina muntada impurtanta ed unica en la promoziun litterara rumantscha. Durant ils ultims trais decennis èn vegnids scrits, legids ed emess radund 11'000 Impuls.
La proxima ed ultima occurrenza dal giubileum ha lieu:
- sonda, ils 4 da november 2023 a las 15:00 en il rom dals Dis da litteratura a Domat
