Siglir tar il cuntegn

Header

cuntegn

Open Air Lumnezia Las bands da la sonda vegnan a pled en Lumnezia

Mintg'onn a l'Open Air Lumnezia èn preschents numerus musicists da l'entir mund. E sco mintg'onn avain nus dumondas sur dumondas. Qua chattais vus las respostas da Nickless, Manillio, The Subways e 77 Bombay Street.

Nickless

Nickless è il sunnyboy da 20 onns cun bler talent sin il palc da l’Open Air Lumnezia.

Nickless ha gugent dà in'intervista a Jachen.
Legenda: Nickless ha gugent dà in'intervista a Jachen. RTR, Curdin Albin

Nicola Kneringer, alias Nickess, sà fitg precis tge ch’el vul: Scriver chanzuns, far musica, esser sil palc – e far carriera. Suenter la scola ha el fatg in practicum tar il producent da musica Thomas Fessler, e quel è lura daventà ses mentur. En il studio da Fessler ha el er registrà sias emprimas chanzuns «Waiting» e «Looking for your Love» che han immediatamain gì success, er tar ils radios.

Oz è Nickless per l’emprima giada a l’Open Air Lumnezia, però la regiun enconuscha el gia.

Manillio

Manillio festivescha sia premiera a l’Open Air Lumnezia. Qua ha el visità ses emprim festival – e l’emprima pagina en l’internet.

Manillio (san.) en discurs cun Danilo.
Legenda: Manillio (san.) en discurs cun Danilo. MAD

Da la pagina na po el betg pli sa regurdar, ma igl era impurtant da dar en ina pagina cun la finiziun «.com». Per Manillio èsi in gieu a chasa a Degen. Ses geniturs avevan numnadamain ina chasina da vacanzas a Camuns, e là ha el passentà bleras uras.

Manillio è apostà vegnì en Lumnezia gia il venderdi per guardar Wanda, ed è stà impressiunà. Sias chautschas èn plain buglia ed uschia vul el er sa preschentar sin tribuna, realness 200. Nus ta giavischain ina buna premiera Manillio, e bainvegni a chasa!

The Subways

Els èn vegnids, han purtà il sulegl ed han fatg il rocken: The Subways da la Gronda Britannia.

The Subways n’han betg gugent sch’ins dumonda els en in’intervista davart il gigant da sandwichs «Subway». Plievgia u betg, sco els dian en la Gronda Britannia: I na dat betg mal’aura, mo la fallada vestgadira. Malgrà tut la buglia han els fatg ina festa da rock. Ed er sch’els n’avessan betg gì electricitad avessan els gugent fatg l’experientscha da sunar unplugged.

Bad Religion

Els tutgan tar il bain cultural dal punk, Bad Religion da Los Angeles. Gia dapi 33 onns èn els da chasa sin las tribunas da quest mund.

Suenter tut quest temp èsi anc adina il pli impurtant ad els che tut funcziunescha sin tribuna, nagins rituals – i sto simplamain funcziunar. E tge fuss in’intervista cun ins dinosaurs dal punk senza prender temp per discutar davart la politica. Actualmain èn discurran els en il bus da turnea sur da las elecziuns en ils Stadis Unids, per tschintg secundas davart il Brexit. Uschia èn els; sin ils proxims 33 onns.

77 Bombay Street

77 Bombay Street fan returanar il sulegl e la stad al OAL16 suenter blera plievgia.

Il sulegl è sa mussà per Joe (san.) e Simri (dre.) durant l'intervista cun Jachen.
Legenda: Il sulegl è sa mussà per Joe (san.) e Simri (dre.) durant l'intervista cun Jachen. RTR, Dominik Hardegger

Il quatter frars, Joe, Matt, Esra e Simri Buchli èn per la terza giada sin il palc da l’Open Air Lumnezia, e questa giada la sonda saira. Avant intgins onns han els anc pudì sunar il suentermezdi, però uss èn 77 Bombay Street ina da las bands svizras cun il pli grond success, er cun il terz disc «Seven Mountains» . Ed adina cura ch’els preschentan in nov disc vegnan els engaschads dal pli grond festival grischun.

Artitgels legids il pli savens