Bleras e blers giuvens ch'han oz enturn 20-30 onns èn creschids si cun serias sco Hotel Zack & Cody, ils striuns da Waverly place u Victorious. Nus avain vulì savair tge ch'è insumma daventà or da quests stars da nossa uffanza ed avain fatg inqual retschertga:
Hotel Zack & Cody: La seria da Hotel Zack & Cody è vegnida emessa dal 2005 fin il 2008. Giugà ils dus schumellins han Cole Sprouse (Cody) e Dylan Sprouse (Zack) ch'han entant 31 onns. Suenter che la seria è ida a fin han els mai pli giugà ensemen sco schumellins. E tar Disney n'èn els era dapi radund 10 onns betg pli stà da vesair. Dentant preschents èn els sin ina moda u l'autra anc adina. Cole Sprouse ha adina puspè gì rollas, ina da las enconuschentas dals ultims onns è quella dal Jughead Jones tar Riverdale, ina seria fitg populara sin netflix. Dylan Sprouse è plitost in zic davos las culissas da l'industria da film. Dentant era el è mintgatant anc avant la camera. El ha per exempel sautà en il video da musica «Consequenzes» da Camilla Cabello ed è stà da vesair en il video da Kygo «Think about you». E sper quai ha el ils ultims onns fundà in’atgna interpresa da vin.
Ils striuns da Waverly place: E lura hai anc dà la seria «die Zauberer von Waverly place» u ils striuns da Waverly place avessi num sin rumantsch. Lezza seria è vegnida emessa ils onns 2007 fin 2012. Là è cunzunt anc enconuschenta Selena Gomez (31) che giugava la rolla dad Alex Russo. Lezza ha suenter propi giu success, betg mo sco actura, mabain era sco cantadura enconusch’ins ella fitg bain. Er David Henrie (34) che giugava il frar grond en la seria Justin Russo ha er adina puspè giugà differentas rollas, per exempel il fegl da Ted Mosby en How I Met Your Mother, ma plitost rollas pli pitschnas.
Dentant è dacurt vegnì annunzià da Disney ch’i vegn a dar in sequel dals striuns da Waverly Place nua che David Henrie vegn a giugar la rolla principala sco Justin Russo. Selena Gomez dentant na vegnia betg a giugar pli sia rolla dad Alex Russo en la seria, ella ves’ins mo en la seria da pilot, uschia stan uss. Ella vegnia dentant ad esser ensemen cun David Henrie a surpigliar la reschia da la seria sco executive producers.
Victorious: La seria che gioga en la Hollywood Arts Highschool è vegnida emessa ils onns 2010 fin 2013. La rolla principala da Tori Vega ha giugà Victoria Justice. En las bleras serias da Disney han las persunas cun las rollas principalas il pli grond succes, dentant betg tar Victorious. Propi il success suenter la seria aveva Ariana Grande che giugava la rolla da Cat. Ella è uss enconuschenta cunzunt sco chantadura. Dentant er Victoria Justice ha anc publitgà intginas chanzuns, dentant betg tantas e betg uschè enconuschentas sco Ariana Grande. Ed er rollas ha ella anc gì ina u l'autra ils ultims onns, tranter auter la rolla principala tar il film «A perfect pairing» (2022) tar netflix. En las medias han ins ils ultims onns adina puspè pudì leger che Victoria saja stada schalusa sin Ariana, perquai che lezza ha dapli success. Dentant ellas duas han adina ditg en pliras intervistas che quai na constettia betg e ch'ellas n'hajan nagin «beef» in cun l'autra.
Influenzaders ed influenzadras
Tut quellas e quels che sa fatschentan u fan il followen influenzaders sin social media, enconuschan Bibis beauty palace, la pli gronda influenzadra da la Germania. Ella è dentant ils ultims dus onns stada cumplettamain davent da la publicitad, suenter che ella e ses um Julian Classen han annunzià ch'els èn ids dapart. Dentant ha ella puspè fatg in comeback – e quai betg pli sco Bibis beauty palace, mabain sco Bianca Heinicke, ses num endretg. Ed ella è enavos cun ina midada dad image total. Avant dus onns avant ch'ella è sparida, ha ella anc mussà sia vita da luxus sin tut ses chanals da social media. Oz vivia ella, sco ella di, vegan e vul discutar sur da temas sociocriticas sin ses chanal.
Era fitg enconuschent en il mund dad influenzaders, cunzunt en l'Italia mabain er internaziunal, è Chiara Ferragni e ses um, il rapper Fedez. Dentant n'èn els dus para er betg pli ensemen. Confermà quai n'han omadus anc betg, dentant datti indizis sin social media, sco per exempel ch'ella na porta betg pli l'anè ed er datti bleras famas entras uschenumnads insiders. E sco pliras medias talianas han rapportà gia avant in mais, n'abita Fedez betg pli ensemen cun ella en lur abitaziun a Milaun. Ensemen han els dus uffants. Sco i va dentant vinavant, resta anc avert. Dentant sco quai che pliras funtaunas da la «Vanity Fair» taliana han confermà, è Ferragni gia sa drizzada ad in'advocata spezialisada sin dretg da famiglia.
Taylor Swift e Travis Kelce
E tge fiss in discurs davart promis e stars senza Taylor Swift. Dad ella vegn rapportà quasi mintga pass ch'ella fa. E dapi ch'ella è en ina relaziun cun il footballplayer Travis Kelce, è lez naturalmain er part dal discurs. Actualmain è Taylor anc adina sin turnea, la Eras Tour ch'è la turnea cun il pli grond success insumma. Ed ella vegn questa stad er per l'emprima giada en Svizra. Ed accumpagnà vegn ella da ses ami Travis Kelce. Sco el ha ditg envers pliras medias, veglia el sustegnair ella, medem sco ella haja sustegnì el en sia stagiun da football. Dad el n'èn dentant betg tuts fan suenter ch'el ha sbragì sin ses trenader al Superbowl quest onn. Dapi lura datti intgins commentaris sut ils posts sin social media da Taylor Swift, che Travis saja in'uschenumnà «Red Flag» e bler fetschian quitads per ella. Dentant paran Taylor e Travis betg a laschar influenzar da quests commentaris e paran dad esser cuntents e sa mussan publicamain adina fitg inamurads.