Che la dumonda, danunder ch'ils objects derivan en in museum, daventa adina pli impurtanta, di er la directura dal museum Andrea Kauer. Visitadras e visitaders tschentan adina pli savens questa dumonda, e perquai vul il Museum retic tranter auter sclerir, sche la derivanza da lur objects è problematica u betg. Sco emprim ha il Museum retic stuì guardar, tge tocs etnologics, pia tocs d'autras culturas, ch'els han insumma en lur exposiziun.
Quels tocs d'autras culturas derivan dal temp da l'entschatta dal museum. Dapi var 100 onns rimna il museum mo pli objects che han ina relaziun cun il Grischun.
Perscrutaziun da provegnientscha
Ils ultims 100 onns n'ha nagin fatg patratgs danunder che quests objects esters èn derivads. Tar la perscrutaziun da provegnientscha han els perquai stuì cumenzar tar nulla. En in emprim pass ha in etnolog studegià ils objects e fatg ina perscrutaziun da basa.
En in segund pass èn vegnids perscrutads ils donaturs respectivs. Andrea Kauer di ch'i saja propi stà mo umens. Quai ch'il Museum retic a Cuira po ussa dir cun segirtad, è ch'els possedian nagin art spoglià, pia nagin art engulà.
En tge connex stattan quests donaturs cun quels objects? Tge istorgias stattan davostiers?
I dat però objects en il Museum retic, nua ch'igl è difficil da determinar danunder ch'els vegnan. In exempel è ina figura d'ivur. Questa sort figura deriva oriundamain da l'Asia, pli exact da Giapun. Sin ina notizia che pendeva vi da la figura era dentant scrit insatge auter: numnadamain ch'in schuldà franzos haja prendì la figura tar la conquista da Peking en China.
Quai chaschuna bleras dumondas. Tscherts objects en la collecziun etica en il Museum retic na vegnan mai a pudair vegnir attribuids ad in origin. Il team da perscrutaziun dal museum lavura tuttina vinavant. Els veglian anc scuvrir dapli fatgs il proxim temp.
