30 onns datti gia l'emissiun Impuls dal Radio RTR. Mintga damaun porta ella ina curta istorgia auditiva, ina vaira u in’inventada, in patratg per cumenzar il di, 365 dis l'onn. En tut quels onns è vegnì publitgà baininqual cudesch cun texts or dals Impuls. In bun mument per render omagi al scriver.
30 onns Impuls, quai èn passa 10'000 texts dad auturas ed auturs rumantschs cun nums enconuschents sco Flurin Spescha, Clo Duri Bezzola, Dumenic Andry, Arno Camenisch, Rut Plouda, Leo Tuor ed auters, dentant era cun nums main u anc betg uschè enconuschents. Quai che collia dentant tut quels e quellas che han contribuì als Impuls è il gust da scriver. Ed il resultat da quest plaschair è ina collecziun da texts ch'è impurtanta era per la litteratura rumantscha.
A chaschun da quest giubileum hai dà intginas occurrenzas per festivar ils Impuls, tranter auter aperitivs litterars en la Lounge da RTR e sco punct culminant ina prelecziun pulpida als Dis da litteratura a Domat.
Ils Cuntrasts han piclà or ils highlights da questas occurrenzas da festa e visità supplementarmain duas auturas ed in autur dals Impuls per vegnir a savair pertge ch'els scrivan insumma. Co enritgescha il scriver lur vita? Tge stgazis datti da scuvrir cun scriver? Myriam Pelican, Zegna Pittet-Dosch e Janic Maskos raquintan. Da vesair e d'udir ils 7 da schaner en ils Cuntrasts sin SRF 1 a las 17:25.
