Gia baud è Timea Luana Panier stada fascinada da colurs, fils, musters e tailas. Cumenzà cun lavur creativa ha ella cun sia tatta, lezza ha mussà da far chaltschiel e da cuser. En ses temp liber ha ella er dissegnà gugent maletgs e musters. Uschia èsi stà cler gia baud che Timea Luana Panier ha in'avaina artistica e creativa. Er en scola è la dunna ch'ha oz 29 onns adina puspè crudada en egl cun cumbinaziuns da resti giaglias, tocs cusids sez u resti in zic extravaganta. Ella saja adina crudada gugent en egl, di la Sursilvana.
En scola han conscolaras er gia dumandà sch'jau saja tschorva da colur.
Sch'i haja dà reacziuns, haja quai gist anc motivà pli fitg da sa vestgir auters ch'ils auters. Timea Luana Panier che viva a Basilea giavischass en Svizra dapli curaschi da sa vestgir e da gughegiar da cumbinar pli colurà ed extravagant.
Moda è sia gronda passiun
Ch'ella veglia ir en direcziun da moda è stà cler baud a Timea Panier. Uschia ha ella fatg in'emprendissadi da cusunza a Cuira. Quest temp saja bain stà bel, ma er fitg structurà. Savens saja stà da far lavurs monotonas e memia pauc creativas per la giuvna ch'ha bleras ideas en il chau. Suenter far viadis e lavurar en la gastronomia ha Timea Panier cuntinuà sia via da moda cun studegiar design da moda a Basilea. Ed avant passa in onn ha la Sursilvana accumplì in da ses gronds siemis, numnadamain d'avair l'agen label da moda.
Moda da bogn e dal mintga di
Ensemen cun duas collegas dal studi ha ella fundà in start-up che producescha moda da bogn e dal mintgadi per dunnas. Actualmain lavura il trio vid la segunda collecziun dal label. L'emprima collecziun croda en egl entras colurs giaglias e musters d'undas. Fundar in start-up saja stà in grond siemi ma è er cumbinà cun responsabladads. Uschia sajan ellas pir en la fasa da far enconuschent lur marca e vestgadira da bogn e mintga di per dunnas che vegn producì da PET reciclà. Per finanziar tut lavura Timea Panier anc sco vendidra en ina stizun da tastgas. Ses giavisch è dentant d'in di pudair viver be da l'atgna moda.
Nus avessan pudì lavurar sco emploiadas. Ma per nus trais èsi stà cler che nus lavurain meglier sur sasezzas e nus cumplettain ina l'autra.
L'egl per la moda è adina e dapertut
Sche la Sursilvana è en il tren, sin via u ad occurrenza ha ella adina l'egl per la moda. Sch'i crodia si insatge spezial pledentia ella er savens la glieud per dumandar danunder che la vestgadira è. Plinavant ha ella era adina ses cudeschet per far notizias. Uschia pensia ella adina davart novs looks ed il chau lavuria. Moda prenda en ina gronda part da la vita da la dunna da 29 onns. Ella blocheschia dentant era sapientivamain temp nua ch'ella na pensa betg vid resti, colurs e tagls. Lura s'inscuntra Timea Panier gugent cun collegas, fa yoga u ina spassegiada en la natira. En quests muments chargia sia energia creativa da nov.
Or da l'archiv
RTR ha accumpagnà Timea Luana Panier durant ses studi, cura ch'ella è sa prepara sin sia lavur da diplom – ina show da moda.
