Questa fin d’emna envida la Vita e cretta cun la scienziada da religiun Farida Stickel ad in viadi en l’Iran, nua che 90 milliuns umans duajan eleger in nov parlament.
Gia il num uffizial – Republica Islamica Iran – mussa, che la religiun gioga ina rolla centrala. Ma quant religius èn ils umans da l’Iran insumma, co funcziunan lur elecziuns e tge è succedì cun la revoluziun da las dunnas da l’atun 2022?
Elecziuns da parlament en l'Iran
Sche la Republica islamica Iran elegia questa fin d'emna ses parlament, n'ha quai betg da far bler cun elecziuns sco quai che nus Svizras e Svizzers enconuschain ellas. Quai resorta dal discurs cun la scienzada da religiun Farida Stickel.
Elegì sa be vegnir quella u quel che correspunda exactamain al profil actual, ch’il régime dals spirituals islamics en l’Iran, dals mullahs, giavischa. Tut tschellas u tschels n’han nagina schanza.
Da vender – organs
Naginas schanzas na paran n’er ils umans da l’Iran dad avair. Il consum dad anti-depressiva sia extrem aut, per vegnir finanzialmain sur las rundas porschia la glieud en inserats publics lur organs per vender e millis e millis da medis èn partids da l’Iran.
Farida Stickel raquinta dad in pajais desillusiunà, nua che mintga moviment vegn surveglià dal stadi repressiv e nua che mintga moviment sa vairamain esser il davos. Da quai dat perdetga er la revoluziun entant taschentada brutalmain – quella cul motto «dunna – vita – libertad».
Dr. phil. Farida Stickel è scienzada da religiun e tranter auter er experta per l’istorgia da la religiun en l’Iran. Sper arab e tirc discurra ella er farsi, la lingua uffiziala da l’Iran, ed ha divers contacts en il pajais.
Actualmain maina ella er la gestiun dal seminari da studis religius a l’Universitad da Turitg.
Il proxim termin d'elecziuns dal super-onn 2024 che la Vita e cretta vegn a tematisar è ils 17 da mars.
Lura elegia la Russia danovamain ses president vegl e nus discurrin da la rolla da la baselgia ortodoxa en l'apparat da pussanza dal dictatur Putin.
