Dapi 175 onns pudain nus, l’entschatta mintga trais pli tard mintga quatter onns, eleger in nov parlament naziunal. L'october dal 1848 han ins elegì en Grischun en districts electorals separads ils emprims quatter cussegliers naziunals. Dapi lura han 84 umens e sis dunnas represchentà il Grischun en la Chombra gronda a Berna. Ils cussegliers dals chantuns vegnivan ils emprims decennis elegids dal Cussegl grond. En la Chombra pitschna han enfin oz 41 umens represchentà noss chantun.
Tgi ha gì ils davos 175 onns e tgi ha oz las meglras cartas per ir a Berna? Co vesevi ora cun la participaziun a las votaziuns pli baud e tge quota ans spetga questa dumengia? Valentin Schmed e Guadench Dazzi sa fatschentan cun la campagna electorala actuala, scrutinis dal passà, dattan in sguard sin il di d’elecziuns e discutan tge che pudessan esser las eventualas surpraisas dal di.
