Flavio Andri - In cor per il hockey

Flavio Andri (45) è savens en la halla da glatsch da Tavau, betg mo quels dis da la Cuppa Spengler. Ses figl è goli en l’equipa da juniors U17 ed uschia è il fan da hockey uschè savens sco pussaivel preschent. E cunquai ch’il figl giuven gioga il mument a Cuira pendulescha el tranter las duas hallas da glatsch e tut quai sper la lavur sco revisur en in biro, nua ch’el è partenari e manader da partiziun. Per l’econom ed expert da revisiun n’è quai dentant negin stress – anzi el giaudia quels muments. E natiralmain saja el losch da ses dus figls che vivan er in pau il siemi dal bab ch'ha schon adina fatg gugent sport. Stinà na saja el dentant insumma betg – quai saja la vita dals mats – el accumpogna els simplamain cun dar sustegn e la tenuta da vita da giudair quels muments.