Il medi e chirurg engiadinais Gian Arard Melcher viva cun sia dunna a Greifensee (Turitg) ed alternant en sia chasa paterna a Zuoz. Dapi il 2015 è l’um da 68 onns en il cussegl administrativ da la Fundaziun provediment da sanadad Engiadin’Ota (SGO), nua ch’el ha surpiglià il presidi l’onn passà. Quitads fan actualmain surtut las cifras da l’ospital regiunal a Samedan che ha scrit cifras cotschnas cun in minus da 5 milliuns francs l’onn passà.
Jau crai che l’ospital regiunal a Samedan vegn a restar. La dumonda è dentant en tge furma e quant che la populaziun è pronta da pajar.
Suenter ch’il bab da dus uffants creschids ha finì sia carriera professiunala da chirurg a l’ospital ad Uster – avant la vegliadetgna da pensiun – ha Gian Arard Melcher fundà avant set onns in’interpresa da cussegliaziun per ospitals e partiziuns medicinalas. En ses temp liber giauda el la natira, la chamona da famiglia en la Val Varusch ed er temp prezius cun ses trais biadis.
Creschi sì è Gian Arard Melcher cun sia mamma a Zuoz, sco bengiamin, cun duas soras pli veglias. Ch’el seguiss professiunalmain en il fastizs a ses bab, n’era betg adina cler per el. Finalmain s’è Gian Arard Melcher decidì cunter in studi d’istorgia rumantscha e per la medicina. Suenter ina sconfitta professiunala, nua ch'i n'ha betg funcziunà cun vegnir en Engiadina a lavurar sco chirurg, ha la lingua en famiglia er midà da rumantsch sin tudestg.
In’ura – in giast. In inscunter cun ina persuna interessanta che raquinta da sia vita, da sias activitads ed experientschas.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.
