Suenter 30 onns sco curatur dal Museum per communicaziun a Berna è l’exposiziun vegninta la davosa da Kurt Stadelmann. El va en pensiun. Avant da far quai ha el dentant anc realisà in siemi persunal, el ha elavurà in’exposiziun cun il titel «Nichts». Cun quella mussa el, che nagut è per il solit chaussa d’interpretaziun, che quai sa cumpigliar bler umor e ch'«il nagut» vegn adina definì da ses conturn. Damai – che nagut è eba tut auter che nagut.
«Nagut» en furma d'in chastè en l'aria
L’exposiziun prenda tranter auter sut la marella chaussas che paran mo d’esser nagut. Sco in spazi vid sin ina tastatura. L’effect da placebo. In chastè en l’aria. U ina pausa d'emissiun. «Atgnamain faschain nus in’exposiziun davart insatge ch’i na dat gnanc. Nagut n’è mai nagut. Gnanc ina rusna è nagut. Ella vegn definida entras quai ch’è enturn ella», explitga Kurt Stadelmann.
Pitschnas chaussas invisiblas
Nagut n'ha en quest cas da far nagut cun ponderaziuns filosoficas, igl è plitost in'avischinaziun a las pitschnas chaussas da la vita dal mintgadi che nus na remartgain strusch, perquai ch’ellas èn per exempel invisiblas ubain inudiblas per nus umans.
Star davant il nagut
Che nagut po ultra da quai esser collià cun ina tscherta tragica, era quai mussa l’exposiziun en il Museum per communicaziun. Per exempel, sche umans èn en fugia e stattan davant il nagut. Ubain sche umans han ina malsogna sco per exempel ina depressiun e na sentan nagut pli.
Sch'ins s'occupa propi dal silenzi, da la lungurella, dal nagut, è la schanza gronda ch'ins scuvra la ritgezza dal detagl.
Explorar il nagut, quai fa Vita e cretta per e cun Vus, sin in viadi che po avrir novas portas e mussar novas perspectivas. In viadi en il nagut.
