Jon Luzzi è naschì a Strada, creschì si sco figl d'in randulin engiadinais a Lucca en Italia. Là studegia el teologia, fa gronda carriera sco professer d'universitad e lavura per 25 onns vid la translaziun da la Bibla en talian modern, cun la finamira da render la Sontga Scrittira accessibla a tuttas e tuts. Quai è quella giada en l'Italia catolica, nua che la Bibla en latin è reservada mo per paders e prers, in act revoluziunari. Ses spiert ecumenic e progressiv frunta dentant sin opposiziun, saja davart protestanta sco era catolica.
Cun ina docu-ficziun fa la Marella reviver durant in'ura la vita straordinaria dal «Jon da Rossas» ch'è daventà famus sco Giovanni Luzzi – in viadi radiofonic che ans maina da Strada a Lucca, da là en Scozia ed en America per turnar lura a Roma ed en il Puschlav.
Cudeschs:
- Giovanni Luzzi: Dall'alba al tramonto. Appunti autobiografici. Firenze 1934
- Giovanni Luzzi: Algordanzas d'ün vegl vallader, da Dr. Jon Luzzi da las Rossas, Ristampa separada dal Tramagliunz 1938
- Hans-Peter Dür: Der Engadiner Giovanni Luzzi als theologischer Kommunikator zwischen Nord und Süd. Zürich 1992
En occasiun dals 75 onns suenter la mort da Jon Luzzi repetin nus questa Marella dal schaner 2018. Il Museum d'Engiadina Bassa a Scuol mussa anc enfin ils 22.10.2023 in'exposiziun speziala cul titel «Giovanni Luzzi – teolog e visiunar ecumenic.
