Avant in onn è Martin Candinas vegnì elegì sco president dal Cussegl naziunal. Atgnamain è l’elecziun stada ina formalitad, damai che quest uffizi vegn repartì en roda tranter las partidas. E tuttina, per blers en Rumantschia è quell’elecziun stada insatge spezial.
Cun Martin Candinas ha finalmain puspè ina giada in Rumantsch dastgà prender plaz sin la sutga dal pli aut Svizzer. Candinas ha nizzegià questa tribuna. Regularmain ha el discurrì in zichel rumantsch durant las sessiuns. Ses successur Eric Nussbaumer ha ditg a la fin da la legislatura «Cun Martin Candinas è il rumantsch daventà in veritabel blockbuster. La frasa «la sessiun ei aviarta» vegnia a restar en memoria a tuts ed a tuttas.
Quant persistenta è la cumpagnia rumantscha?
L’avegnir vegnia a mussar quant persistenta che sia prova da sensibilisar per la quarta lingua saja, di Candinas. «Jau na sun dentant betg daventà president dal Cussegl naziunal per midar il mund, era betg il mund linguistic.»
Jau hai simplamain vulì mussar ch’il rumantsch è dapli che mo folclora.
E sco ch'i para è quai reussì. Edith Graf-Litscher, cussegliera naziunala da la Partida socialdemocratica ha manegià envers RTR: «Martin Candinas ha mussà a nus quant impurtanta che la quarta lingua naziunala è, e cun quai ch’el ha adina puspè menziunà quai, ans ha el sensibilisà».
Il collega da partida da Martin Candinas, il Tessinais Marco Romano ha constatà: «Grazia a Martin Candinas n’essan per ina giada betg pli nus stads il pitschen linguatg minoritar, mabain il frar grond dal rumantsch. Quai è grondius».
Er Aline Trede dals Verds è plain laud. «Martin Candinas ha fatg ina fitg buna campagna per sia Surselva e ses Grischun, nus essan sa tschentads sin tut ils viadis cun el insanua en il Grischun, nus enconuschain ussa tuts era la regenza grischuna.»
Jau crai che quai dettia bain in connex.
Per la fin da ses onn d’uffizi datti pia bler laud da collegas. Sche quai resta dentant dapli che politica da simbol vegn ins a vesair sch’i va puspè ina giada per sustegnair cun daners la quarta lingua naziunala. Tant è dentant gia ussa cler, a l’olma rumantscha ha l’intermezzo à la Candinas segiramain fatg bain.
Il pli aut Svizzer è er stà giast en l'episoda 36 da noss podcast da Berna Café federal.
Fabia Caduff ed Adrian Camartin han tranter auter vulì savair dad el tge ch'ins discurra cun il papa e daco ch'el ha ina cravatta dal Vietnam a chasa.
