Uss cun 24 onns ha Nemo bandunà la Svizra vers Berlin per purtar enavant sia carriera musicala. Fin da l’onn 2023 ha Nemo communitgà publicamain d’esser nunbinar – dapi lura saja sia vita musicala daventada pli simpla e libra.
L’emprim mument da «aha» saja stà sin tribuna durant in musical. Qua haja Nemo realisà ch’ins possia star sin tribuna e sa preschentar avant in public cun chantar e sautar. La proxima cumparsa è stada en in tut auter rom: Sia preschentaziun al Cypher16 è ida viral. Là dentant sco rappader giuven che ha fatg furora en l’entira scena da Hip Hop Svizra. Grond success hai lura dà cun musica per tudestg svizzer sco per exmpel «Himalaya», «Ke Bock» ni «Du». Fin 2023 ha Nemo communitgà da s'identifitgar sco persuna nunbinara e cumbinà quai cun la chanzun «This Body». Ina chanzun che tematisescha da betg sa sentir bain en l’agen corp. E medemamain ina chanzun englaisa – Nemo ha numnadamain prendì la decisiun da far per il mument musica per englais e betg pli per tudestg svizzer.
Uschia è era la chanzun per l’Eurovision Song Contest 2024 a Malmö en Svezia per englais: «The Code». Ina chanzun che porscha ina u l’autra surpraisa che cuntegn in zic da tuttas staziuns da la persuna musicala giuvna. Elements che paran sco d’in musical, parts da pop, parts da rap e sco tema principal l’esser nunbinar. E tuttina preschenta Nemo era qua puspè ina nova fassetta musicala.
Suenter quatter participaziuns al final da l’ESC è era quest onn il squitsch in zic pli gronds ...
