Tenor il president dal comité d'organisaziun, Norbert Cavegn, è quai il resultat da plirs onns dira lavur nua ch'els hajan empruvà da bajegiar si tut puspè. Plinavant saja reussì dapi intgins onns da chattar in bun mix da musica e da marketing.
Engrondir l'open air n'è nagina opziun
I saja vegnì optimà bler ils ultims onns ed ins sappia uss tge che l'open air ed er l'areal possian vertir, uschia Norbert Cavegn. Questa grondezza tanschia per producir quai ch'els vulian. Ils custs vegnian er en l'avegnir ad esser il grond problem – qua saja simplamain da chattar vias però betg cun crescher, crescher, crescher, agiunta il president dal comité d'organisaziun.
Sistem da pajar cun bindel è sa cumprovà
Tant organisaturs sco er visitaders èn cuntents cun il nov sistem da pajar 'cashless', senza bancnotas e munaida. D'optimar saja sulettamain l'organisaziun a Glion ch'è cunzunt la gievgia stada surchargiada. Per l'ediziun 2018 che ha lieu puspè la penultima fin d'emna da fanadur saja però gia avant maun ideas, uschia Norbert Cavegn.
RR novitads 06:00