Gia baud ha Fenice gì l’interess e la passiun per la musica. Per propi cumenzà hai dentant cun 15 cura ch’ella ha survegnì lecziuns da Michele Fischietti – ina scolasta da chant ch'ha tranter auter era gia lavurà cun Giusy Ferreri. Curt pli tard ha Fenice lura era cumponì sias emprimas atgnas chanzuns, l'emprim plitost en il gener pop. Durant il temp da corona e lockdown è quai sa sviluppà vers in stil pli direct e cun dapli parts da rap. Sveglià attenziun ha ella lura cun videos en las raits socialas. En quels ha ella preschentà «freestyles» – improvisaziuns mez chantadas e mez rappadas.
La passiun per la musica viva ella era en sia scolaziun: 2022 ha ella fatg ses diplom da clavazin al conservatori a Como nua ch’ella vegn proximamain era a serrar giu ses studi da chant d’Opera. Sia single «Haiku» ch’è cumparida avant curt è per part ina chanzun electronica da pop cun parts rappadas. Per l’avrigl è ella vegnida selecziunada da l’acziun Mx3 – tuts per in, e po ussa preschentar durant l’entir mais en ils radios da RTR, SRF3, Couleur 3 e Rete Tre.
L'unitad fa la forza! Ils quatter radios SRF3, Couleur 3, Rete Tre e RTR scuvran e promovan mais per mais ina nova chanzun svizra. Las redacziuns da musica da RTR, RSI, RTS e SRF preschentan communablamain musica ch'ha attratg l'attenziun da las redacziuns. E quai exclusivamain per chanzuns, ch'èn da chattar sin mx3.ch.
