Il Tuatschin Pascal Gamboni na ston ins betg pli preschentar – en Rumantschia è el enconuschent gia daditg. Sia musica tutga gia bunamain tar il bain cultural rumantsch. El è stà ed è anc adina part da differents projects – rumantschs ma er englais. El è fitg activ e suna per differentas occurrenzas, da la lecziun da yoga fin tar il festival da musica. L’avrigl 2024 preschenta il chantautur ses proxim album – il quantavel che quai è n’è gnanc uschè simpel d’eruir e n’era betg impurtant per Pascal Gamboni.
In caos creativ
Ideas per texts, tematicas e skizzas notescha el sin pitschens cedels ch’el ha adina en tastga. Igl è in sammelsuri da notizias e maletgs. Quai para er d’esser il cas tar ses nov album «caos el paradis». Igl è ina rimnada d’ideas, tuns, samples, chant, effects e tematicas. Il resultat è in album pli experimental che sias ultimas publicaziuns. Tenor il chantautur èsi in album da concept – in album nua che las chanzuns na stattan betg per sasez mabain èn cumbinadas tematicamain tar in’ovra. Il caos en il paradis vegn tegnì ensemen dal ruassaivel Tuatschin, da sia vusch e ses chant.
Las chanzuns raquintan dal viadi da Pascal Gamboni or en il mund e co ch'el è tuttina restà fidaivel a sias ragischs. Sco usità raquintan ellas era dal mintgadi, dal duair e stuair e da las 100’000 chaussas ch’èn da far di per di. Cun paucs pleds e divers elements musicals reusseschi ad el adina puspè da crear in’atgna atmosfera. In exempel per quai è la chanzun «Showdown». Là procuran tranter auter ina battaria «gitta», elements d’in synthesizer che regordan vi dad in film da sgarschur e singulas parts discurridas per in’atmosfera anguschanta. Ils pleds chantads «Nus dain mai se» pon lura tut tenor dar in sentiment ironic ubain in zic speranza a la melodia inquietanta. La chanzun che suonda sin l’album è «Solver El Sulegl», ina chanzun che schlucca puspè e po quietar cun tuns sferics.
«Caos el paradis» è in album cun pizs e chantuns, igl è in caos creativ e lascha avert la dumonda sche quai è in sguard en il chau da Pascal Gamboni. Igl è pulpì, ritg ed auza sia musica ch’el numna «Alpine Lo Fi» sin il proxim nivel. Quest album taidlan ins il meglier da chanzun 1 fin 12. Er suenter tants onns activs puspè ina fassetta nova dal Tuatschin.
Dapli da nova musica rumantscha e musica da l’entir Grischun chattais qua:
