Benedetg, u pli correct Benedikt, è naschì ils 13 d'avust 1918 a Ziràn sco figl da Tumasch Dolf e Berta (nata Plattner). L'emprim'instrucziun da clavazin ha el survegnì da ses bab. Suenter la scola populara ha el frequentà il gimnasi a Cuira nua che ses interess per musica è vegnì promovì. Durant ses tschintgavel onn da gimnasi ha el studegià teoria da musica al conservatori a Turitg. Cun 18 onns ha el scrit sias emprimas ovras, tranter auter la «Sonate für Violine und Klavier» dal 1936.
Suenter la matura il 1938 ha el vulì studegiar musica. Sin giavisch da ses geniturs ha el dentant fatg in studi da teologia. Il 1941 era el en ina classa per contrapunct tar Paul Müller a Turitg, ha fatg il diplom da teoria e contrapunct e surpiglia ina plazza sco plevon refurmà a Valendau-Sagogn.
Il 1948 ha el visà la plazza ed ha terminà ses studi da musica ch'el ha lura serrà giu il 1952. Tschintg onns pli tard ha el survegnì ina plazza sco magister da clavazin ed orgla al seminari da magisters a Cuira. Là è el stà fin la pensiun il 1984. Sper sia lavur sco magister ha el cumponì bler. Sia musica è influenzada dal neoclassizissem franzos e da la chanzun populara rumantscha. El ha scrit fitg bleras chanzuns per chors (rumantsch e tudestg) ha fatg ovras per clavazin ed orgla sco era musica da chombra ed intginas pitschnas ovras per orchester.
Ses relasch
Benedetg Dolf è sa domicilià a Rofels (sur Maiavilla) nua ch'el ha vivì cun sia dunna Trudi (nata Briner) e lur figlia Menga. En ses dachasa è el s'occupà cun la musica presenta e dal passà. El ha archivà 5'000 casettas da musica da diversas registraziuns da radio, ha rimnà 3'000 plattas fonograficas ed ha gì ina biblioteca da 5'000 cudeschs.
Il 1980 ha el survegnì da la regenza grischuna il premi da renconuschientscha per ses merits per la musica grischuna e per promover la cultura rumantscha.
Ils 5 d'avust 1985 è el mort.
Benedetg Dolf en emissiuns da RTR:
Artg musical:
Noss chors:
Magazin da cultura:
