Naschì è Hans Lanicca ils 9 da matg 1920 a Präz sco figl da Melchior Lanicca e Barbara (nata Lareida) che faschevan il pur. Gia da pitschen ensi ha el chantà bler cun ses geniturs, en spezial cun sia mamma dentant er en la stiva da sia tatta. Chantà ha el savens chanzun tudestgas, enconuschentas e melodias popularas.
Al seminari ha el emprendì clavazin (tranter auter tar Duri Sialm). Suenter ch'el ha frequentà cun success il seminari da magisters a Cuira n'ha el ils emprims dus onns betg chattà ina plazza ed ha lavurà en il guaud. Il 1942 ha el lura pudì cumenzar ina plazza sco magister a Masagn e davent il 1945 a Tusaun. Hans Lanicca è sper la scola s'engaschà fermamain per la Scola da musica Tusaun, per il chant. In studi da musica n'ha el betg pudì finanziar. Pir cun 40 onns è el stà tar in professer en la Bassa nua ch'el ha prendì uras da chant durant las vacanzas da stad.
Cumponì ha l'autodidact Hans Lanicca ca. 60 chanzuns e quai ord in basegn pratic per ses chors en Tumleastga e Mantogna. Chanzuns da furma simpla, bain chantablas per «ses purs», sco el ha ditg en ina intervista cun RTR il 1986. Dasperas ha el anc tschentà u arranschà da quai da 40 chanzuns per ses chor da Preaz/Präz, per il Männerchor Heinzenberg e per il Talverein Domleschg e sa chapescha era per ses scolars a Masein e Tusaun.
Las pli enconuschentas chanzuns dad el èn: «Steilas», «Suns e tuns dil cor», «Segner, mussa nus la veia», «Da rendieu» ed «I han der lieb leng Summer».
Mort è Hans Lanicca ils 19 da favrer 2008 a Farschno (Fürstenaubruck).
Hans Lanicca en emissiuns da RTR:
Artg musical:
Hosp da l'emna:
Contribuziuns curtas: