Ils 19 da fanadur 1953 è naschì Josias Just sco quart ed ultim figl da Peter e Leni Just. Ensemen cun ses trais frars Peter, Christian e Martin è el creschì si en in ambient muntagnard ed ha passentà ina bella uffanza ad Andeer. Ses bab ha lavurà l'emprim en las fortezzas da Crestawald e pli tard tar las ovras idraulicas Rain posteriur (KHR).
L'amur per la clarinetta
Gia sco pitschen mat ha Josias gì il giavisch da pudair emprender la clarinetta, el na sa sez betg daco che quest instrument ha gì (ed ha anc adina) ina tala calamita. El ha pudì ir ad uras da ses instrument da siemi. Suenter scola ha el fatg in emprendissadi sco serrer da maschinas a Domat e parallel cumenzà a prender uras al conservatori a Lucerna. Cun il diplom da clarinetta en satg ha el cumenzà a dar uras da musica en Surselva, Tumleastga e Cuira. Pervia dals lungs viadis tranter las singulas uras en questas regiuns n'ha el betg pudì dar uschè bleras uras sco giavischà, pertge entant è el maridà e bab da duas figlias (Martina e Madleina). Oravant tut per motivs economics è el s'annunzià sin ina plazza libra sco magister da clarinetta al conservatori a Turitg. El ha survegnì la plazza ed è passa 30 onns pendulà tranter Turitg e Cuira. Er a la Scola chantunala ed a la Scol'auta da pedagogia a Cuira ha el instruì scolaras e scolars ed intgins onns er dirigì la musica da cadets.
Dus cors en il pèz dal musicist
Creschì si è Josias Just cun la musica populara e quella fascinescha el anc oz. Gia da giuven ha el sunà ensemen cun ses frars e fatg musica da divertiment. Anc oz sunan els da temp en temp ensemen. Dapi bunamain 50 onns è Josias Just era commember da la chapella Oberalp. Tar quest engaschi èsi vegni gia durant ses temp a Domat. Era Arno Jehli, il «bandleader» da la chapella, ha lavurà en la fabrica da Domat ed in di dumandà Josias sch'el n'haja betg gust far in viadi a Mallorca per ina festa da l'emprim d'avust. Natiralmain ch'il giuven clarinettist ha gì gust. Or da quest emprim engaschi è daventà in' engaschi che dura anc oz.
Entras ses studis ed er entras l'instrucziun da clarinetta ha Josias Just dentant er emprendì d'enconuscher «ses» instrument en il mund da la musica seriusa, classica. Ed er quella plascha bain. Passa trais decennis ha el concertà ensemen cun l'Orchester da chombra da Turitg, er sco solist. Ils onns 80 ha el fundà ensemen cun Martin Imfeld e Martin Zimmermann il trio da clarinettas Calamus Trio che sa preschenta dapi 20 onns (suenter la mort andetga da Martin Imfeld) cun duas clarinettas ed in clavazin (Alena Cherny). Quest onn realisescha il Calamus Trio gia sia 40avla turnea da stad.
Er anc uss, dapi che Josias Just è pensiunà, guarda el da sunar mintga di clarinetta. Sch'el sa prepara per in concert lura dapli e pli intensiv. Sco quai ch'el ha raquintà ad RTR n'haja el anc mai gì ina «crisa» da sunar la clarinetta, la fascinaziun ed il plaschair da sunar quest instrument saja restada.
Josias Just en emissiuns da RTR:
Artg musical:
Tadlai nossas pli novas registraziuns, intervistas cun cumponists ed istorgias da davant e davos ils palcs da concert.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.