Simon Camartin è naschì ils 25 da settember 1945 e creschì si a Mustér ensemen cun ses frar Iso (24.03.1944). Là ha el frequentà la scola populara ed il gimnasi da la scola claustrala. Ses geniturs musicals han dà vinavant lur plaschair vid la musica a Simon. El ha pudì prender uras da violina tar il pader e pli tard avat Pankraz Winiker. Pli tard ha el lura er survegnì instrucziun sin il clavazin. Er pader Flurin Maissen (scolast da fisica) ha dà vinavant a Simon l'euforia per la musica. A quels dus paders haja el d'engraziar ch'el saja s'infectà per la musica, ha ditg Simon Camartin.
Nus avain tadlà uras ed uras ensemen musica, en spezial Beethoven e Bruckner.
Sco gimnasiast ha el fatg il propiest da scuvierer mintg'emna in'ovra musicala ed ha er investà ses daner da satg per cumprar partituras. Ils frars Iso e Simon han er sunà quartet ensemen cun ils paders Pankraz ed Anselm (Enzler).
Suenter il gimnasi ha Simon Camartin studegià biologia a Basilea ed è returnà a Mustér en la scola claustrala sco magister. Dasper la professiun è el er s'engaschà politicamain sco president communal e deputà en il Cussegl grond. Cun bun 50 onns, il 1977, ha el vulì il dies a scola e politica ed decidì da sa deditgar cumplainamain a quella passiun che ha accumpagnà el dapi si'uffanza: La musica.
Jau mettel gugent insatge sin via, dun impuls. Ma cura che la chaussa marscha dovr jau insatge nov, novas sfidas.
El è sa decidì da daventar dirigent cun la finamira da far pli enconuschent la musica grischuna sin il parchet internaziunala. Il diriger ha Simon Camartin betg emprendì sin la via classica. En Svizra aveva el gi magari contact cun il dirigent grischun Räto Tschupp che ha pudì dar ad el intgins cussegls. A Prag ha el gia l'entschatta dals onns 70 gì la chaschun d'esser preschents a concurrenzas da diriger. Vitiers ha el visità pliras tschient emprovas d'orchester cun dirigents. Quai saja stà ina scolaziun practica e persistenta, ha ditg Simon Camartin.
Jau hai udì e vesì co dirigents sco Karel Ančerl, Zdenek Košler, Václav Neumann, Ladislav Slovák e blers auters han fatg emprovas cun lur orchesters. A Basilea hai jau visità sco auditur curs da direger tar Pierre Boulez. Quai era mia scolaziun.
Vitiers è Simon Camartin in autodidact fitg talentà cun in talent natiral da diriger. Cura ch'el è sa decidì da lavurar sco dirigent ha el detg spert survegnì offertas correspondentas e quels engaschis han purtà success. Ils invits èn vegnids bunamain automatic.
In dirigent cun carisma
Fin oz ha Simon Camartin dirigì radund 30 orchesters ed ensembles en l'Europa, l'Asia e l'America latina sco per exempel a Mexico City, Kiew, Damascus, Bucarest u er Budapest. Il pli savens ed er fitg gugent collavurà el cun orchesters da l'Europa orientala. Er fitg gugent lavura el cun orchesters da giuvenils. El ha dirigì concerts cun solistas e solists enconuschents ed adina puspè è el er sin turnea ensemen cun sia dunna, la violinista Oana Milena.
Sco dirigent ha el er purtà la musica grischuna e svizra viadora el grond mund e la musica dal grond mund qua tar nus. Igl è adina stà in grond desideri dad el da far pli enconuschenta la musica grischuna tar interpretas ed interprets, instituziuns u festivals. Sin fundament da ses impuls han divers emetturs da radio en l'exteriur er fatg emissiuns spezialas davart la musica grischuna ed el sez ha cumbinà ses concerts en ils pajais da l'Europa da l'Ost cun referats a scolas da musica ed universitads davart las «Caracteristica da la cultura grischuna».
Ed el ha adina promovì giuvens talents da musica. Cun sia chasa editura Sordino ha el derasà ovras contemporanas da cumponistas e cumponists indigens ed esters. Dal 2004 fin il 2011 è el stà confundatur ed intendant dal festival musical MENHIR a Falera. Là ha el mess in focus spezial sin musica contemporana. L'atun passà ha el per exempel dirigì a Lemberg la primaudiziun da «Tezlas», in ovra ch'el ha laschà scriver sin ina poesia da Arnold Spescha.
Regularmain dirigia Simon Camartin a Falera e Vaz Sut tranter Nadal e Bumaun il concert sinfonic tradiziunal, per regla cun il L'viv National Philharmonic Orchestra of Ukraine da Lemberg.
Simon Camartin en emissiuns da RTR:
Artg musical:
