Il return en il Grischun va maun en maun cun il return a las ragischs musicalas: suenter ina saira en in’ustaria a Vella, nua che nagin saveva pli tuttas strofas da “la canzun dil bau” decida Corin Curschellas da far giu pulvra a la chanzun populara rumantscha. Nova vita duain las veglias chanzuns survegnir!
Cun Albin Brun, Patricia Draeger e Claudio Strebel registrescha ella il 2012 l’album “La Grischa” e va en turnea tras tut la Svizra.
Zuola roda zuola - live en il curtin da glatschers a Lucerna
Per che las chanzuns popularas rumantschas na vegnian betg mo tadladas, mabain era chantadas cumpara il cudesch da chanzuns “La Grischa 1”.
Il 2013 cumpara l’album “Origins (trad.)”. Sco tar l’album La Grischa è Corin Curschellas sa messa a la tschertga da chanzuns popularas ed ha arranschà quellas da nov. L’album è registrà cun la furmaziun Pflanzplätz ed il violinist Andy Gabriel.
Il 2015 suonda il terz album da Corin Curschellas enturn la chanzun populara rumantscha. Cun Ursina Giger ed Astrid Alexandre turna Curschellas a l’essenza da la chanzun populara: il chant a capella.
Pli a funs che Corin Curschellas va a chavar per tschertgar veglias chanzuns popularas, e dapli truvaglias ch’ella fa.
Uschia èsi nagut auter che natural ch’era in quart project vegn creà: “La Nova”. Quest album cumpara il november 2016 e cuntegna registraziuns da Corin Curschellas cun Vera Kappeler, Markus Flückiger, Peter Conradin Zumthos ed Anna Trauffer.
L’emprim d’october festivescha Corin Curschellas ses anniversari cun ina gronda saira culturala en il Teater da la citad da Cuira. Quella saira vegn ella era a preschentar ses nov cudesch cun chanzuns popularas rumantschas: “La Grischa 2”
