Siglir tar il cuntegn

Header

cuntegn

Corin Curschellas Corin Curschellas - in cor mundial per la chanzun

Corin Curschellas, la grande dame da la chanzun rumantscha, ha cumplenì dacurt ses 60avel anniversari.

Ils ultims 5 onns ha Corin Curschellas briglià surtut sco rearranschadra ed interpreta da chanzuns popularas rumantschas, revitalisond en ses divers projects sco La Grischa, Triada e La Nova inquala melodia mezpersa u emblidada. Ma per chattar quel stgazi ha la chantautura grischuna traversà ina carriera musicala cun enorm bleras facettas ed aventuras. Cumenzà ha Corin ils onns settanta sco vusch accumpagnanta dal trubadur curiens Walter Lietha. Cun sia vusch amiaivla, fina, regordanta da lunsch a Joni Mitchell, ha la musicista embellì seguentamain discs e concerts da numerus collegas, da David Byrne enfin Andreas Vollenweider e Hardy Hepp. Remartgabel è stà il project «hendrixian» cun il ghitarrist vietnamais-franzos Nguên Lê, u lura la lunga hospitanza jazzusa en il Vienna Art Orchestra da Mathias Rüegg. Animada da dimoras a Berlin e Paris ha Corin Curschellas baud er entschet a producir atgnas ovras. Sin ses primalbum «Music Loves Me» dal 1992 paradescha ina elavuraziun «worldmusicala» da la poesia «La pura» da Gion Cadieli, ina chanzun ch’è daventada in vair hit radiofonic. L’onn 1997 ha la chantautura mess en musica spiras poesias rumantschas contemporanas, registrond l’album respectiv «Valdun» en in ambient «indie-alternativ» a New York. E cun il project «Sud des Alpes» dal 2002 ha la Curschellas fatg in pass musical vers l’Africa. Il pass che l’ha manada finalmain enavos tar las melodias alpinas.

Artitgels legids il pli savens