Il 2001 fa Corin Curschellas part dal “Global Vocal Meeting Project” – ina turnea maina ils musicists da tut il mund en Germania, Svizra ed en ils Stadis Unids da l’America.
Dapi bun 30 onns è Corin Curschellas gia sin tribuna, dapi bun 10 onns concertescha ella cunzunt cun sias atgnas chanzuns e furmaziuns.
Ussa sa tschenta ella ina nova sfida: far programs da solo.
I suonda in’entira seria da tals programs: endlICH (2004/2005), MONO (2005), “Pomp auf Pump” (2010) u era “Wittern und twittern” (2011).
extracts da MONO
Dasperas chanta Corin Curschellas enavant en divers projects. Dal 2001-2008 per exempel tar “eCHo” – in project cun Christine Lauterburg, Walter Lietha e Doppelbock. En eCHo vegnan chanzuns popularas arranschadas da nov.
Sumegliants è era il focus da Max Lässer e ses “Überlandorchester”, cun il qual Corin Curschellas è ida sin turnea il 2007.
Corin Curschellas & Überlandorchester
Malgrà engaschaments en diversas furmaziuns e programs da solo chatta Corin Curschellas temp ed energia da publitgar ses otgavel album da solo.
Per registrar quest disc viagia la musicista puspè a New York e turna enavos cun “Grischunit”, anc ina giada in album che cuntegna exclusivamain chanzuns en rumantsch.
The Making Of Grischunit
Era sin “Grischunit” chattain nus ina chanzun populara rumantscha en nov vestgì: la “canzun da Ziteil”.