La giuvna teologa e reverenda evangelic-metodistica Sarah Bach è insatge sco in'icona dal moviment per il clima. Ella sa participescha a demonstraziuns ed acziuns da dischobedientscha civila che promovan la protecziun dal clima. Il pli savens saja ella dentant activa davos las culissas.
Da sa tatgar sin via n'è betg adina raschunaivel. Ils bloccavias rendan però attent ad in tema malempernaivel. Persunas che sa vilentan pudessan era nizzegiar quest temp per reflectar lur atgna relaziun cun la protecziun dal clima.
Per exempel fa Sarah Bach lavur da scleriment. Savens era en sia funcziun sco reverenda evangelic-metodistica en las plaivs da Schwarzenburg e Gstaad, nua ch’ella lavura. Quai fetschia senn, cunquai che activistas ed activists na cuntanschian betg exnum las persunas cartentas.
Jau crai en in Dieu che sustegna nus e di era ina giada ‹Quai è merda, quai che capita sin il mund!.›
Da talas persunas cartentas, da commembers e commembras da las plaivs, senta Sarah Bach bler interess, dentant era gronda sceptica. Oravant tut quai che pertutga acziuns dispitaivlas sco sa tatgar sin vias frequentadas.
Co che la reverenda ed activista argumentescha, sch'i va per talas acziuns dispitaivlas udis Vus en Vita e cretta. Ella raquinta era co che sia baselgia e la raspada vegnan a frida cun ses engaschament per la protecziun da l'ambient e dal clima e declera er tge rolla che baselgia e cretta han en ses cumbat.
En ils onns 1970 ed 80 è la baselgia stada ordvart activa e cumpetenta en dumondas davart la protecziun dal clima. Oz è quai mo pli uschia en talas regiuns ch’èn gia pertutgadas fitg da la midada dal clima.
