Accumpagnament tras muments da tristezia
«I dovra forsa in zic curaschi da far l'emprim pass per tschertgar agid suenter avair pers ina chara persuna», di sora Madlen Büttler.
Dapi passa 35 onns accumpogna la sora da l'urden dominican persunas sin lur davos viadi terrester. Suenter la mort porscha ella agid a las famiglias che restan enavos. L'onn 2019 han sora Madlen Büttler e Barbara De Giorgi avert il Café da malencurada sut il patrunadi da l’uniun paliativa dal Grischun. Cun rituals, discurs e barats accumpognan las duas dunnas a moda professiunala tras ils differents process da la malencurada.
Accoglientscha chattan tuts en il Café da malencurada, independent da la confessiun u religiun. En quests onns d'experientscha saja sa mussà, ch'adina dapli persunas giuvnas chattan la via en il Café da malencurada.
Passa duas terzas da las persunas che arrivan tar nus èn sortidas da la baselgia. Ma ellas dovran in lieu per s'avrir e raquintar da lur mal e lur quitads.
En Vita e Cretta raquintan las duas manadras dal Café da malencurada da Glion da lur experientschas, da lur lavur e da las sfidas. Ma era da la necessitad da questa purschida. Heidi Tomaschett ha pers ses um Clemens l’october 2022 causa cancer. Suenter la mort da ses um ha ella chattà sustegn en il Café da malencurada. L'istorgia co tut è capità il di da natalizi da dunna Heidi e tge che ha dà forza e plaschair da viver vinavant ad ella, tradescha dunna Heidi Tomaschett-Hildbrand en Vita e cretta.
En il Pled sin via sa fatschenta Andrea Friberg da Danis cun il temp d'advent e la glisch da chandailas, e la muntada da la glisch en il temp da tristezza.