Il pli vegl film mussa in tren a vapur da la Viafier retica sin il tschancun tranter Preda e Bravuogn l'onn 1905. El è vegnì chattà en il National Film and Sound Archive of Australia a Canberra.
Sch'in film da quels onns exista anc, lura è quai simplamain ina gronda fortuna.
Il material dals bindels da lezzas uras – il celluloid sin basa da nitrat – inflammescha enorm svelt. Bleras rollas da film èn ubain arsas ubain vegnidas destruidas per raschuns da segirtad.
A Columbia en ils Stadis Unids ha Felice Zenoni chattà il pli vegl film cun tun, in film dal 1928. Per l'istoricher da film Roland Cosandey è quai ina vaira sensaziun.
La perla filmica persunala dal reschissur è il film d'Alfred Hitchcock. L'emprima versiun dal classicher dal kino «The man who knew too much» dal 1934 è vegnida inspirada e filmada per part a San Murezzan. Quai è stà nov per Felice Zenoni.
Las filmadras ed ils filmaders da quella giada eran sco ils influenzers dad oz.
Ils pioniers dal film gievan là, nua ch'ils «bels e ritgs» passentavan lur temp liber. Gist San Murezzan e ses conturns eran in hotspot e lieu ideal per talas filmadas. In che ha filmà ils onns 1920 la vita davos è Gustav Sommer, el aveva ina affar da fotografias a Schlarigna.
La pli gronda part da las truvaglias filmicas èn films mits. Per quellas sequenzas filmicas ha la chantadura Cinzia Regensburger cumponì nova musica da film. Cun sias cumposiziuns fa ella ina punt en il preschent.
