Suenter las vacanzas da stad entschaiva la scola puspè en il Grischun. Scolars e scolaras ed era la magistraglia spetga in nov onn da scola cun blera materia d’instrucziun nova, pretensiuns autas e bler squitsch. La situaziun saja ozendi tut in’autra che pli baud, di Silvio Dietrich da Glion. Dapi 30 onns lavura el a la scola da Glion. Durant 12 onns è el stà scolast e dapi 18 onns lavura el sco mainascola.
Nus empruvain da promover tut las scolaras e tut ils scolars sin lur stgalim individual. Esser tolerant è qua inevitabel.
I dovria toleranza da tut las varts, e quai mintga di. Quai saja ina chaussa elementara ed era pretensiusa. Tant per las scolaras e per ils pedagogs sco era per ils geniturs.
Co che la toleranza da scolars e scolaras, da geniturs, ma era da la societad sco tala envers el sco scolast è sa midada entaifer ils onns raquinta Silvio Dietrich en Vita e cretta. Vinavant era cura ch’i dovra pli pauca toleranza e tge ch’èn las pli grondas sfidas.
Nus stuain guardar ch’ils scolars e las scolaras van suenter or en la vita cun uschè blera toleranza sco pussaivel.
