Dapi buob siemian Claudio Albin e Pieder Decurtins da Trun da seser en l’agen auto da cursa. Per pudair realisar lur siemi e finanziar lur passiun entschaivan els avant 20 onns a vender autos da cursa a Trun Darvella. In mund ch'ha da far nagut cun il sport d’autos.
Naìv saja quai bain stà. I saja dentant era stà lur cletg da betg ponderar memia ditg mabain simplamain far.
Qua stoss ti esser naìv, uschiglio na fas ti betg insatge uschè.
180 grads differents
Pieder e Claudio dian da sasezs ch’els sajan 180 grads differents. Mo gist pervia da quai haja quai funcziunà ils davos 20 onns, uschiglio na fissan els betg pli ensemen. Entant che Pieder è fitg impulsiv ed in pau caotic è Claudio il ruassaivel. Per el fiss ir cursas in stress, Pieder dovra quai adrenalin. Malgrà ch’els sajan fitg differents, di Claudio Albin ch'i dettia els mo en il duopack.
Nus datti mo en il duopack.
Da 2 sin 11
Avant 20 onns gievan Pieder e Claudio sulets sin cursas. Oz dumbra il team da cursa da T2 11 persunas. In inschigner da cursa, in manager da team, in segund pilot, tschintg mecanists e gidanters èn cun els sin pista.
Dapi dus onns parta T2 en il Le Mans Cup, ina seria da cursas internaziunalas. Entant che la stagiun actuala è stada pauc buna, gartegia gist a Spa en Belgia sin lur pista preferida da mussar tge ch’els san. «Sin quest mument avain nus spetgà ditg», di Claudio Albin.
