Gia da pitschna buoba hajan persunas fatg attent ch'ella avessi potenzial da daventar model. Quai saja restà enfin il di dad oz e perquai haja ella lura insacura era gì interess da star davant la camera. Anc durant ses emprendissadi mercantil en ina garascha d'autos ha Vanessa Fay Duque fatg ses emprim shooting che ha sveglià sia passiun per la lavur sco model.
Sa preschentar davant la camera
Ussa, dus onns pli tard è ella gia stada davant la camera per diversas marcas da resti, davent da resti da sport enfin dessous e resti da bogn, cosmetica ed auters artitgels da reclama. La giuvna sursilvana cun ragischs dal Portugal n'è pia betg in model da «high fashion». Ella na preschenta betg las novas collecziuns da resti sin la passarella, mabain davant la camera. En quella categoria sajan auters attributs impurtants. Numnadamain in bel carisma, ina fatscha simmetrica ed autras atgnadads unicas d’in model.
Ch'ella fissi ina giada da vesair en il pli grond center da cumpra da l'Europa, cun quai n'avess Vanessa Fay Duque mai quintà:
Jau n'hai gnanc savì che questa fotografia vegnia squitschada sin in placat. Jau hai pensà ch'els dovrian be ella per lur pagina d'internet.
Tuttenina haja la fotografa lura tramess ad ella la fotografia dal center da cumpra e pir lura haja ella realisà l'entira chaussa. Gugent less il giuven model era vesair il placat cun ses agens egls ed ha perquai planisà da visitar insacuras quest center da cumpra a Londra.
Dasper l'esser model s'interessescha Vanessa Fay Duque era per il nutriment ed il bainstar da corp ed olma. Ella sa scolescha sco cussegliadra da nutriment e less en l'avegnir cumbinar quai cun instruir yoga e pilates. Ch'ella ha la pussaivladad da realisar sa sezza po ella era engraziar a ses geniturs ed a ses partenari che sustegnan ella – mentalmain ed era finanzial.
Damai ch'jau abitesch il mument cun mes geniturs a Bogn Ragaz poss'jau lavurar era senza ch'jau gudogn blers daners.
Cun esser model possian ins gudagnar blers daners, di la dunna da 22 onns. Il pli bler ch'ella haja survegnì per in shooting saja stà 1'600 francs per duas uras lavur. Sch'ins saja s'etablì en la branscha possia quai dentant era esser 50'000 francs per shooting. Ed era sch'ella saja anc lunsch davent da quai, saja ella pertscherta ch'era ella possia cuntanscher quest nivel. Enfin lura dovria dentant blera pazienza e motivaziun.
La concurrenza saja gronda en la branscha da model e perquai haja ella stuì emprender d'acceptar ch'ins vegnia bleras giadas refusà e na survegnia betg il job giavischà. Per part s'annunzian 200 models che correspundan gia al maletg tschertgà ad in casting. Lura stoppian ins entaifer paucas minutas persvader. E sch'ins na vegnia lura betg tschernì na dastgian ins betg prender persunal quai, di Vanessa Fay Duque.
Abus sexual en la branscha da model
Sper las bellas varts e la passiun che la Rumantscha ha per sia professiun ha ella era gia stuì far experientschas fitg malempernaivlas. Quellas sajan capitadas cun fotografs. Singuls umens che hajan fatg fotografias cun ella, hajan cleramain surpassà ses cunfins. Ella saja vegnida sfurzada da far fotografias senza resti ed haja gì tema da sa defender.
Jau met a tuttas ed a tuts a cor: sche vus essas en uschia ina situaziun: giai! Era sche vus avais pajà per laschar far las fotografias.
Per evitar quellas situaziuns uschè bain sco pussaivel na giaja ella betg pli suletta a shootings e sch'i na saja ina giada betg pussaivel da pigliar cun insatgi, scrivia ella almain a ses confamigliars nua ch'ella saja gist.
Dapli acceptanza en la branscha
Dentant betg be il cumportament envers ils models davant la camera pudess tenor ella sa meglierar, mabain era l'acceptanza e la diversitad en la branscha. Era sche dunnas sco ella che n'hajan betg las mesiras da 90-60-90 possian lavurar sco model, pudessia la branscha anc vegnir pli toleranta. Vanessa Fay Duque giavischass ch'era persunas che na correspundan betg a l'ideal da bellezza pudessan realisar il siemi d'esser model. Ma da quai saja la branscha anc lunsch davent, era sch'i saja vegni meglier ils ultims onns. La finala veglian las fatschentas preschentar lur products sin la meglra moda e maniera e gist perquai vegnian las bleras fotografias era retuschadas, era quellas dal model rumantsch. Per ella èsi perquai impurtant ch'ella sa mussia era natural, senza retuscha e sminca, sin sias medias socialas.
Ella haja savens cumpareglià si'atgna optica cun quella dad autras dunnas preschentas en las raits socialas. Entras quai saja ella savens sa sentida mal e perquai vul la Sursilvana mussar ch'era sia pel haja structuras, poras e bots. E che quai saja il pli normal dal mund e betg insatge ch'ins stoppia zuppentar, era sche la branscha da model fetschia quai savens.
In’ura – in giast. In inscunter cun ina persuna interessanta che raquinta da sia vita, da sias activitads ed experientschas.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.