Il pader benedictin era independents, in um che gieva sia via. Ma adina en quella lingia da l’evangeli dal predi dal culm, di Mariano Tschuor en vita e cretta. Il carstgaun saja ina stgaffiziun directa divina, ergo stoppian ins respectar el dad A fin Z. Quai valia era en sia libertad da laschar patratgar il carstgaun quai ch’el vul patratgar, la devisa da Pader Flurin Maissen.
La natira è la funtauna da tuts misteris ch’includa tut, er la baselgia.
Cun ses studis da scienzas natiralas, dentant er da musica pon ins dir che Pader Flurin Maissen aveva in umanissem general. Sia basa era la stgaffiziun, la natira.
Pader Flurin era ina persunalitad fitg cumplexa ch’aveva ina gronda sabientscha. Forsa la fin da sia vita schizunt era ina tscherta mistica.
Pader Flurin era er in misteri. El aveva interess da tut, dentant be fin in tschert punct. Cura ch’el aveva l’impressiun ch’el sappia tut e haja ditg tut, gieva el tar in auter tema. Pader Flurin s’engaschava fitg per la natira, per proteger quella. Per exempel ha el cumbattì per las auas restantas dal Rain u era fatg polemica en connex cun la Greina. Quai per preservar la natira da l'abus total perquai che la natira aveva per el dapli che be in niz economic.
Da Pader Flurin na pon ins betg dir ch’el saja stà religius ni pietus. Ma el era expressivamain pader pervia da la scola. Ma el era in carstgaun da Dieu, da la bibla.
