Siglir tar il cuntegn

Header

cuntegn

En claustra Diari: Gievgia

Il chor en l'ureglia. L'orgla en il chau.

Durant l’emprim’uraziun n’hai jau oz betg pli quest problem da tegnair avert mes egls. La notg passada hai jau durmì meglier e dapli.

Perquai che la baselgia Sogn Martin na vegn betg stgaudada èsi adina in pau fraid. Actualmain forsa 13-14 grads. Ma vid quai sa dis’ins.

Refectori: Sala da mangiar.
Legenda: Refectori: Sala da mangiar. RTR, D. Hardegger

Insatge ch’jau lev gia savair glindesdi saira ma ch’è pir ussa puspè vegnì endament: Cura mangia quel che prelegia durant la tschavera? El che prelegia texts tar temas da religiun, politica, istorgia, istorgia da religiun e politica etc. La resposta hai jau survegnì da Bruder Stefan. El che prelegia mangia suenter cun quel ch’ha da servir en ina stanza pli pitschna, sper il refectori.

La parita medievala dal bajetg e dals rituals po forsa sugerir in ambient a la veglia, qua ha il mund modern e digital dentant era invas ils mirs gross. Ils muntgs han tut tenor incumbensa pagers e schizunt (na sai betg sche tuts) iPhones. En stivetta in tablet.

Parts dal mir na mancan betg mo als chantuns.
Legenda: Parts dal mir na mancan betg mo als chantuns. RTR, D. Hardegger

Il suentermezdi hai jau in termin cun Bruder Fridolin, el ma mussa il tetg e la fatschada da la claustra. Enfin quest mument n’eri a mai betg conscient quant donnegià ch’il vestgì da la claustra è propi. La liadira ha pers e vegn vinavant a perder ses tegn. Perquai èsi necessari da renovar ella dadora sco era endadens. E per quai è la claustra dependenta da donaziuns.

Ussa sun jau en claustra prest quatter dis. Il temp va qua cun differentas uras. Ina ura mussa quant ditg ch’jau sun gia qua, en dis – e quai èn atgnamain paucs.

audio
[02.06.2016] Da paders e giasts
ord RTR Audio dals 02.06.2016.
laschar ir. Durada: 4 minutas 1 Secunda.

L’ura che mussa las uras realas va pli plaun perquai ch’il di è lung. E l’ura ch’è activa cura ch’jau sun vid far mes diari, ils discurs per il radio u era las filmadas va pli spert. Igl è in viadi cun differentas spertadads. Ina giada memia spert, autras giadas fitg plaun. Sch’jau na vess nagin chalender e na vess era betg planisà mes dis ordavant na savess jau probablamain betg tge di ch’igl è e quant ditg ch’jau hai anc da star. Ma manca mes conturn famigliar a chasa e mes amis, ma era la fatschenta ed il contact cun mes collavuraturs. Ma manca la vita co ch’jau hai vivì ella enfin dumengia passada.

Bruder Fridolin mussa la pli bella vista ch’ins po avair davent da la claustra.
Legenda: Bruder Fridolin mussa la pli bella vista ch’ins po avair davent da la claustra. RTR, D. Hardegger

Suenter il guid sin la puntanada circumdant la baselgia Sogn Martin hai jau intgins muments per mai. Tadlar puspè ina giada mi’atgna musica, tge ventira ch’igl è d’udir puspè ina giada Edward Sharpe and the Magnetic Zeros, Johnny Cash ed Eluveitie. Enfin qua n’hai jau simplamain betg gì peda per quai.

Davos las culissas da la baselgia Sogn Martin.
Legenda: Davos las culissas da la baselgia Sogn Martin. RTR, D. Hardegger

Enavos en claustra, sin il chor sura, sent jau ils tuns da l’orgla, las vibraziuns dal sun e las vuschs choralas che cuntanschan mias ureglias. Jau percepesch quai ussa auter che a l’entschatta. Oravant tut il chor cun sia melodia plitost monotona arriva en ina moda e maniera chauda. Insaco è quai meditativ, calmant. Ma cura che las vuschs chantan anc suenter en mias ureglias, era sch’jau sun en chombra, ma lascha quai desperar. Mo pled discurrì, betg chantà, po qua gidar.

Tadlond in «Hörspiel» vom jau suenter lura ina davosa giada a letg, qua a Mustér.

Artitgels legids il pli savens