Siglir tar il cuntegn

Header

cuntegn

En claustra Diari: Mardi

Mes emprim di entir en claustra a Mustér.

Via tar la baselgia da Nossadunna. Correct, questa fotografia n'hai jau betg fatg gia a las 5:30.
Legenda: Via tar la baselgia da Nossadunna. Correct, questa fotografia n'hai jau betg fatg gia a las 5:30. RTR, D. Hardegger

Il svegliarin numer 1 hai jau smatgà davent. Svegliarin 2? Deplorablamain èsi gia la 5 e mia davosa schanza da star si, also nagut cun smatgar davent e spetgar sin il proxim. Tschertgar ensemen la vestgadira e spert preparar camera ed uschia perquai ch’jau emblid adina insatge la saira avant. In spurt si en claustra, tras X corridors en direcziun baselgia da Nossadunna. Là èsi stgir, ma gia las 5:30. L’oraziun vess da cumenzar.

«Oberer Chor» vegn endament. Sch...öne Sache! Vess gì dad ir en baselgia da Sogn Martin, sura insanua tar l’orgla che vegn restaurada. In spurt enavos, da stgala si, tras ischs e portas, anc ina stgala, la davosa porta. La camera lasch jau ordvart perquai ch’jau hai eh schon in retard da bunamain 10 minutas, mo betg anc vilentar dapli. Ma jau crai che nagin ha survegnì cun quai... :)

Suenter essans tut al ensolver, paun, chaschiel, müesli, café e latg datti tranter auter. Sco tar mintga tschavera na vegn betg discurrì in pled. Cura ch’igl era mangià vev jau «liber» in pèr minutas. Trair flad en baselgia claustrala durant filmar intgins detagls.

La messa da las 7:30 hai jau era frequentà, è gea part da mia visita qua en claustra. Intginas registraziuns en furma da tun e maletg qua, intginas fotografias là. Ma betg memia bler, jau sun giast e na less betg disturbar grond il decurs dal di.

audio
[31.05.2016] Mes emprim di
ord RTR Audio dals 31.05.2016.
laschar ir. Durada: 3 minutas 13 Secundas.

Spert vegni las 10:30 ed plaunsieu hai jau da preparar per il discurs live (!) en il Radio Rumantsch. Per fortuna hai jau gia preparà la gronda part ier saira. Tge plaschair ch’igl è stà da durmir mo sis uras... Ma sch’jau na vess betg fatg quai vess jau probabel betg savì tge dir.

Lura puspè currer ensi en l’edifizi catolic e metter sin stativ la camera per l’oraziun da mezdi. E bääm gia èsi mezdi. Hai era gist gronda fom. Oz datti puspè ina schuppa (en lignar gusts n'er jau anc mai bun), ris cun ina sosa da charn (era sosas asiaticas na sai jau betg propi differenziar) e sco dessert ina scadiolina cun frajas. Era questa giada nagut da crititgar.

Suenter ma retir jau per pudair scriver intgins pleds sin questa pagina da diari. I fa bain dad esser in pau per sai. Ed ussa ma dumond gist tge fotorgafia ch'jau pudess metter en. Ditg betg pli plazzà ina en quest text.

Zack, qua è ella. Uschia vesi ora en mia chombra sch'jau na sun betg gist en claustra. In monitur per scriver, in per editar ed in per la controlla online.

Savais tge? Jau hai gia survegnì in pac. E quest less jau ussa pachetar ora. Ok, quels ch'han guardà minuzius mintga detagl sin la fotografia han forsà gia vis il crutsch. Quest pac hai jau purtà cun mai sin claustra. Mes collegas dal Stab Program tar RTR m'han dentant scumandà d'avrir avant mi'arrivada a Mustér quest päckli.

Quest pachet ominus ch'jau hai purtà cun mai e spetgà forsa memia ditg per deliberar ses cuntegn.
Legenda: Quest pachet ominus ch'jau hai purtà cun mai e spetgà forsa memia ditg per deliberar ses cuntegn. RTR, D. Hardegger

Ier saira na vev jau simplamain nagina veglia pli sin anc dapli surpraisas. Also nagut encunter surpraisas positivas, ma insacura èn ins halt era stanchel. Perquai pir oz. Merci Kegi e merci Orlando per il pachet! - vus che savais ch'jau na baiv nagin café avais dà cun energia en furma da zutger. Ma danunder savais vus tge salami ch'è mes preferì? G.R.A.Z.I.Aaaa. Ma en quest pac hai era fazielets da cosmetica.. era sch'igl è anc matg, vus savais ch'jau sun en claustra!?

Dapli en la galaria da maletgs.

Durant la vespra.
Legenda: Durant la vespra. RTR, D. Hardegger

Vinavant vai las sis - vus savais quai gia - cun la vespra. Questa giada hai jau dumagnà da far fotografias per vus. I n'è betg simpel da far in pèr pass, il palantschieu sgara fitg gugent.

Avant che bandunar il chantun dals benedictins en direcziun balcun per ils giasts registresch jau anc curt cun la camera da filmar.

E lura èsi gia puspè temp per la tschaina. Salata da tartuffels, wienerli e brassà hai dà. Per restar curt: Cun il cumplet da las 20:00 finesch era jau plaunsieu mes di. Buna notg.

Artitgels legids il pli savens