Purtret da l’emissiun

Il num «Cuntrasts» è program. L’emissiun approfundescha ils pli differents temas grischuns e rumantschs e mussa quels en in artg pli grond, cun tschertgar las ruttadiras e guardar adina er davos las culissas.

Dumengia saira a las 17:25: Dapi decennis è quai in termin impurtant en las stivas da Rumantschas e Rumantschs. Igl è l’ura per «guardar rumantsch». Dapi intgins onns sa numna l’emissiun «Cuntrasts» e cuzza 25 minutas. Ils films da «Cuntrasts» rimnan in enorm panopticum rumantsch: da chavacristals enfin chors sublims, da fimaders da brissago enfin cusunzas da Bernina, da puras suveranas enfin raividers temeraris u da resgias grondas enfin aclauns pitschens.

Purtret da Bertilla Giossi. Avrir maletg en lightbox.

Legenda da maletgs: Bertilla Giossi. RTR

«  Pudair lavurar per Cuntrasts vul dir per mai, pudair m’occupar creativamain da l’istorgia e da las istorgias dal mund rumantsch. »

Bertilla Giossi
redactura «Cuntrasts»

Regularmain accumpogna e purtretescha la redacziun era persunas cun biografias insolitas u destins commovents. E da cas a cas è la squadra era da la partida ad occurrenzas pli grondas e rapporta direct dal lieu, tant dad occurrenzas agriculas u happenings sportivs e litterars.

Redacziun: Anna Serarda Campell, Bertilla Giossi, Casper Nicca, Isabelle Jaeger, Paula Nay, Petra Rothmund, Ruedi Bruderer

Manaders: Guadench Dazzi, David Truttmann