Digitip – Elavurar fotografias avant che publitgar sin Facebook

Per elavurar fotografias na dovri nagin profi. Cun la dretga app sin il telefonin, è quai fitg simpel e svelt.

In telefonin che fotografescha la tur Eifel a Paris.
Legenda da maletgs: Elavurar las fotografias da vacanzas. Colourbox

Las cameras da nos telefonins han ozendi ina resoluziun talmain buna, ch'ins sa adina e dapertut far fotografias. Adina puspè ves'ins dentant sin facebook e co. fotografias tortas ubain cun lingias electricas davant ina bella muntogna. Quai na sto betg esser. Cun la dretga app sin il telefonin sa mintgin elavurar las fotos avant che publitgar.

Simpel e svelt

Il digitip preschenta trais apps per meglierar fotografias. Quai èn «Autodesk Pixlr», «Snapseed» ed «Adobe Photoshop Mix». Las emprimas duas numnadas èn fitg simplas. En paucs pass e senza leger manuals san ins cun quellas apps optimar ils tuns da colur, tagliar ora persunas ubain objects che disturban u aschuntar texts.

Per perfecziunists

La terza app Adobe Photoshop Mix ha spezialmain ina buna funcziun per far fotomontaschas. Ins elegia duas fotografias, definescha ina sco fund e taglia ora ina part da l'autra fotografia. Silsuenter san ins posiziunar quei ch'ins ha tagliau ora sin il fund. La app porscha sco introducziun in tutorial che declera las funcziuns impurtontas.

Tut las trais apps èn gratuitas ed i dat ellas per iOS ed Android.

Autur/a: Onna Riedi