Cuira: Acziun vendita da tastgas a favur da chasa da dunnas

Differentas secziuns grischunas da l'organisaziun da dunnas «Zonta» han ramassà ils ultims mais passa 800 tastgas da dunnas da segund maun. Quellas vulan ellas vender durant ina bursa publica a Cuira.

Pliras tastgas da dunnas per dunnas.
Legenda da maletgs: Ils dus locals che l'organisaziun ha prendì a fit èn plains cun tastgas duvradas. MAD

Il gudogn da la vendita da tastgas va a favur da la chasa da dunnas a Cuira. Il rebumb saja stà grond en tut las regiuns en Grischun ha declerà Ursina Gapp da Guarda, commembra da la secziun Zonta Engiadina / Val Müstair. «Sa separar d'ina tastga da maun che stat a cor è grev per ina dunna».

Valurs emoziunalas
Per bleras dunnas han las tastgas da maun surtut ina valur persunala. Quella na dependa betg dal pretsch ch'ins ha pajà per la tastga, mabain da la funcziunalitad e dals numerus muments ch'ins ha passentà cun ella. Tuttina hajan bleras dunnas savì sa separar da pliras tastgas preziusas e preferidas.

Bursa a Cuira
Las tastgas ch'èn vegnidas ensemen tar l'acziun da ramassar en il chantun Grischun hajan las commembras da las secziuns da Zonta entant zavrà e sortì tenor pretsch e grondezza. Acquistar las tastgas pon ins durant la bursa: sonda, ils 2 d'avrigl 2016 da las 10:00 – 16:30 en la halla da la chasa municipala a Cuira. Tut il gudogn da l'acziun da vendita va a favur da la chasa da dunnas a Cuira.

Autur/a: RTR/cl