Tavau +1,7 grads - dal midament dal clima e l'agir en quel connex

L'incumbensà per l'ambient dal cumin da Tavau, Gian Paul Calonder, ha inizià in film che mussa l'influenza dal midament dal clima a Tavau.

La gruppa dal Grialetsch e dal Bernina l'onn 2003
Legenda da maletgs: La gruppa dal Grialetsch e dal Bernina l'onn 2003 keystone

Il midament dal clima è in fatg. I vegn adina pli chaud, e quai, sin l'entir mund. A Tavau èn las temperaturas s'augmentadas per 1,7 grads celsius ils ultims tschintg decennis. Ina consequenza concreta da quest augment è tranter auter che l'enviern vegn adina pli curt en quest lieu da cura. Il cunfin dal guaud è 40 fin 50 meters pli auts ch'avant 50 onns.

Film mussa exempels concrets

En ses film mussa Gian Paul Calonder vida exempels concrets tge influenza che la midada dal clima ha per Tavau. El mussa tranter auter il vadretg da Grialetsch che ha pers la mesadad da sia surfatscha durant ils ultims 50 onns. U lura co las temperaturas mordan vi dal glatsch permanent sin il pass dal Flüela. Il film mussa dentant era co reducir las emissiuns da gas. L'effect da serra, chaschunà entras questas emissiuns, è il motiv principal per la midada dal clima.