Siglir tar il cuntegn

Header

cuntegn

General Corrigenda

Telesguard 01-12-2022

Cas Giusep Nay ed Orlando Zegg: RTR ha rapportà la gievgia passada (01-12-2022) da la procedura giudiziala cunter l’anteriur president dal Tribunal federal, Giusep Nay. En il cas tractà dal Tribunal regiunal Malögia ha la Procura publica dal Grischun accusà Giusep Nay d’avair disfamà (üble Nachrede) e calumnià (Verleumdung) il derschader regiunal Orlando Zegg cun ina brev da lecturs en la Posta Ladina. (26-01-2021)

En la rapportaziun dal Telesguard dals 01-12-2022 n’è la suandanta formulaziun concernent quest cas betg stada daltut correcta: «En questa brev scriva Giusep Nay ch’il derschader regiunal – senza numnar il num dad Orlando Zegg – saja la culpa che la polizia e la KESB hajan fatg acziuns intolerablas encunter Adam Quadroni.»

Correct è dentant che Giusep Nay scriva en questa brev da lecturs che las intervenziuns da la polizia cun agid da la KESB e dal derschader regiunal responsabel sajan stadas cumplainamain nungiustifitgadas cunter Adam Quadroni, e che Giusep Nay scriva ch’el sa refereschia qua sin il rapport parzial da la PUK.

Nus ans perstgisain per quest sbagl. Gion Caviezel, manader actualitad

Telesguard dals 25.09.2022

En il Telesguard dals 25-09-2022 vegn pretendì che la PS haja betg pudì persvader il pievel tar la votaziun pertutgant la taglia anticipada. Quai na constat betg. La PS ha fatg il referendum cunter la lescha, uschia ch’il pievel ha decidì en chaussa.

Nus ans perstgisain per quest sbagl. Flavio Bundi, schefredactur

Novitads RTR dals 19./20.8.2022

En la novitad davart la sistida da las investigaziuns cunter Marco Steck, l’anteriur schef da la Polizia chantunala Engiadina, ha RTR rapportà che Marco Steck è pertutgant l’arrestaziun d’Adam Quadroni nun-culpant.

Quai è dentant fauss, perquai ch’igl è vegnì fatg recurs cunter quai acquittament tar la Dretgira chantunala e cunquai n’è la disposiziun da sistida betg legala.

Nus ans perstgisain per quest sbagl. Gabriela Riedi, manadra actualitad

Novitads Telesguard dals 16.09.2021

En la novitad davart il process cunter il derschader regiunal Orlando Zegg ha la posiziun dal advocat dad Orlando Zegg mancà. Las inculpaziuns cunter Zegg sajan nungiustifitgadas, ha Stefan Metzger, l’advocat dad Orlando Zegg, sutlingià durant il process. Ses mandant haja agì sco derschader en favur dal bainstar da las figlias dad Adam Quadroni. Per Orlando Zegg vala la presumziun d’innocenza.

Plinavant sveglia la formulaziun da la novitad l’impressiun ch’il process haja in connex cun la rolla dad Adam Quadroni sco whistleblower dal cartel da construcziun. Orlando Zegg stat avant dretgira pervia d’abus d’uffizi en sia funcziun sco president da la dretgira regiunala Engiadina Bassa Val Müstair. En questa funcziun ha el prendì pliras decisiuns areguard la separaziun dad Adam Quadroni e sia dunna. L’accusaziun d’abus d’uffizi pertutga ina da questas decisiuns ed ha nagin connex cun il cartel da construcziun.

Nus ans perstgisain per quest sbagl. Valentin Schmed, manader actualitad

Novitads RTR dals 18.04.2021

En ina novitad han las redacziuns dad RTR e da la FMR rapportà da curt – sa referind sin in artitgel da la «NZZ am Sonntag» dals 18 d’avrigl 2021 – ch’i dettia ina procedura penala cunter trais policists chantunals en connex cun in’arrestaziun dal whistleblower Adam Quadroni. En questa novitad èsi vegnì scrit che questa procedura penala sa drizzia era cunter in derschader. Questa constataziun è sbagliada.

Urs Sutter, il procuratur public extraordinari ed engaschà da la regenza grischuna, ha explitgà envers RTR che la part procedurala drizzada envers il president dal tribunal regiunal da l’Engiadina Bassa/Val Müstair n’haja nagin connex cun l’acziun da polizia dals 15 da zercladur 2017 che vegn intercurida. Percunter dettia ina denunzia envers il derschader che pertutga dentant ina ordinaziun tschintg mais pli tard, la quala ha manà ad ina proxima acziun da polizia, ils 17 da november 2017.

Las redacziuns sa perstgisan per avair fatg in fauss connex ed uschia publitgà ina infurmaziun sbagliada. Valentin Schmed, manader actualitad

Novitads RTR dals 20.03.2020

Ils 20 da mars ha RTR rapportà davart il rapport dal post da mediaziun SRG.D pertutgant «Fernsehen SRF, Sendung DOK vom 4. Dezember 2019» («Der Preis der Aufrichtigkeit – Adam Quadronis Leben nach dem Baukartell»). Il text, ch’è stà publitgà oriundamain sin rtr.ch, e la novitad en il Telesguard eran cumponidAs unilateralAs. Uschia n’èn ils utilisaders betg vegnids infurmads dal tut da maniera objectiva ed adequata davart la posiziun dal mediatur public.

Nus ans perstgisain per quest sbagl. Flavio Bundi, schefredactur

Contribuziun «Casa Hess» a Mustér è venala

Ils 04 d’avrigl ha RTR rapportà davart la chasa Hess a Mustér che è venala. Il text, ch’è stà publitgà sin www.rtr.ch ed è vegnì surpiglià da La Quotidiana dals 05 d’avrigl 2019, cuntegn plirs sbagls. Tranter auter è vegnì pretendì ch’ils artavels sajan stads fin avant il Tribunal federal a Losanna en connex cun il dretg da precumpra. Questa infurmaziun na constat betg. Sbaglià è era ch’il figl da Willi Hess haja vendì sia cumpart a las dunnas Couchepin. Correct è che la cuminonza d’artavels Hess haja vendì sia cumpart a la cuminanza d’artavels Couchepin-Hess. Per pudair bajegiar ils parcadis gist dasperas la chasa hai duvrà ina procedura d’expropriaziun ch’è vegnida reglada sin livel chantunal e betg sco pretendì avant il Tribunal federal a Losanna. Plinavant n’era il cumproprietari Willi Hess betg advocat, mabain medi a Glion.

Nus ans perstgisain per questas infurmaziuns sbagliadas.

Valentin Schmed, manader actualitad

Novitads RTR dals 16.10.2014

En las novitads dal Radio Rumantsch e sin www.rtr.ch è vegnì ditg ils 16 d'october 2014 che quatter firmas da Cuira hajan fatg recurs encunter la surdada da las lavurs da stgav e d'impressari cun in volumen da prest 70 milliuns francs en connex cun ils plans d'engrondiment da l'Ospital chantunal a Cuira. Quai n'è betg correct. Correct è che las firmas han fatg recurs encunter las lavurs d'impressari che han ina valur da 47 milliuns francs. Nus ans perstgisain per quest sbagl.

Isabelle Jaeger, manadra ressort quotidian RTR

Novitads RTR dals 04.03.2014

En las novitads dal Radio Rumantsch a las 17:00 e 18:00 è vegnì infurmà che Silvio Derungs haja demissiunà – per motivs privats – sco president da l’associaziun Miraval (Cumbel). Il num è sa chapescha sbaglià. I sa tracta da Silvio Capeder. Nus ans perstgisain per questa infurmaziun sbagliada.

David Truttmann, manader dal ressort quotidian RTR

Novitads RTR dals 12.02.2014

En ina contribuziun al Radio Rumantsch è vegnì rapportà ils 12 da favrer da la funtauna Lischana a Scuol. RTR ha pretendì en quella contribuziun che il capo- funtauna da Scuol haja gì l’idea da sbassar la pumpa per enchaschar l’aua minerala. Entras quella mesira saja la mineralisaziun da quella funtauna puspè sa normalisada. Quai n’è betg correct. Correct è che quella mesira è vegnida fatga sin proposta dad in geolog che ha cusseglià la vischnanca en chaussa. Nus ans perstgisain per quella infurmaziun sbagliada.

David Truttmann, manader da ressort quotidian

Telesguard dals 09.01.2014

En il Telesguard dals 09 da schaner 2014 è vegnì pretendì per sbagl che Eugen Friberg surpiglia ad interim la direcziun dal manaschi da las pendicularas Breil/Vuorz/Andiast. Correct è ch’i dat ina giunta sut la direcziun da Marcel Friberg. Quella duai garantir la cuntinuitad dal manaschi, sco era l’activitad operativa fin ch’i dat ina nova direcziun. Nus ans perstgisain per quest sbagl.

David Truttmann, manader ressort quotidian

Artitgels legids il pli savens