Cundiziuns d'utilisaziun e decl. davart la protecziun da datas

I. Indicaziun generala

Radiotelevisiun Svizra Rumantscha (RTR) metta a disposiziun sin sia plattafurma d'internet infurmaziuns e datas e – tras colliaziuns e tools – infurmaziuns d'autras paginas-web. Questas infurmaziuns e datas servan sulettamain a l'intent da l'infurmaziun. In na po betg vegnir sa referì u sa fidà da l'actualitad, correctadad u cumplettadad da las infurmaziuns.

RTR resalva expressivamain ils dretgs da midar da tut temp questas cundiziuns d'utilisaziun e la decleraziun davart la protecziun da datas. Vegnan fatgas adattaziuns da quest gener, las publitgescha RTR immediatamain sin sia plattafurma d'internet. Igl è chaussa da l'utilisader da s'infurmar davart la versiun actuala da las cundiziuns d'utilisaziun e la decleraziun davart la protecziun da datas sin la plattafurma d'internet da RTR.

Ultimas midadas: 10 da settember 2015

II. Cundiziuns d'utilisaziun

§ 1 Champ d'applicaziun

RTR è responsabel sulettamain per ils cuntegns elavurads, publitgads e derasads da RTR. Las cundiziuns d'utilisaziun valan per ils cuntegns da la pagina-web www.rtr.ch e per tut las subdomenas che tutgan a questa domena (purschida-web da RTR).

§ 2 Responsabladad

RTR na stat – uschè lunsch che la lescha permetta – betg bun ni per cuntegns e programs che vegnan derasads sin la purschida-web da RTR ni per ils donns che resultan. Quai vala per tut ils geners da donns, en spezial donns che pon resultar da sbagls, retards u interrupziuns en la transmissiun, en cas da disturbis dals indrizs tecnics e dal servetsch, cuntegns fallads, perdita u stgassada da datas, virus u en in'autra moda e maniera cun utilisar questa purschida-web.

Per intents d'infurmaziun po RTR inditgar colliaziuns a terzas paginas. En quest cas na surpiglia RTR betg la responsabladad per il cuntegn, la correctadad, la legitimitad e funcziunalitad da paginas-web da terzs, a las qualas la purschida-web da RTR renviescha via colliaziun u tool. Las paginas d'internet che vegnan avertas via colliaziun, vegnan avertas sin atgna ristga.

§ 3 Dretg d'autur

Ils cuntegns da la purschida-web da RTR èn protegids tenor ils dretgs d'autur valaivels. La purschida-web da RTR na dastga betg vegnir midada, transponida, elavurada, memorisada, copiada u publitgada da nov senza il consentiment da RTR. Il material mess a disposiziun dastga vegnir duvrà sulettamain per intents betg commerzials; il video-player da RTR dastga mo vegnir integrà senza midadas ed en in conturn senza reclamas.

Per la software, las glistas, las datas e lur cuntegns da la purschida-web da RTR che vegnan explicitamain mess a disposiziun per telechargiar vegn dada ina licenza simpla, betg exclusiva e betg transferibla che sa restrenscha al telechargiar e memorisar unic. Tut ils dretgs cuntinuants restan tar RTR. Uschia n'èn oravant tut la vendita e l'utilisaziun commerziala betg permessas.

RTR na stat betg bun per disturbis da la qualitad da l'access sin fundament da forza superiura u sin fundament d'eveniments che RTR n'ha betg da far valair, en spezial l'interrupziun da raits da communicaziun e gateways. RTR na surpiglia betg la garanzia che la pagina d'internet funcziunia senza interrupziuns e senza sbagls e che eventuals sbagls vegnian curregids.

III. Protecziun da datas

§ 1 Champ d'applicaziun

RTR dat paisa a la protecziun da Vossa sfera privata e s'oblighescha da resguardar las disposiziuns legalas en connex cun la protecziun da datas.

La decleraziun davart la protecziun da datas vala per tut las paginas-web da RTR (las «paginas»). Per purschidas da terzs, a las qualas questa pagina renviescha cun tools e colliaziuns u che vegnan integradas sin rtr.ch, na pudain nus betg garantir che las disposiziuns legalas en connex cun la protecziun da datas vegnian observadas.

§ 2 Princip

Da princip pudais Vus far diever da la pagina senza stuair far indicaziuns davart Vossa persuna. Durant Vossa visita registrescha noss webserver sulettamain datas d'utilisaziun nunpersunalas. En uschenumnads logfiles vegnan registrads l'adressa IP da Voss computer u da la rait, la pagina che Vus avais visità sco ultima, il navigatur che Vus utilisais, la data, il temp e las datas telechargiadas. Questas infurmaziuns vegnan rimnadas per far analisas e servan la finala per optimar nossa purschida. A basa da questas datas na po RTR far naginas conclusiuns che mainan a Vossa persuna.

Sin las paginas da RTR èn integradas funcziuns (plugins) da differentas terzas partidas da plattafurmas da social media (Facebook, Google+, etc.). Cun avrir ina pagina-web, sin la quala èn plazzads plugins da terzas partidas pon a maun da quests plugins vegnir transmessas automaticamain datas a las terzas partidas. Sch'il visitader è il medem mument annunzià en ina rait d'ina terza partida, po il visitader sin la pagina-web vegnir attribuì a ses conto da rait. RTR n'ha nagina influenza sin la moda e maniera co che las datas vegnan transmessas.

§ 3 Indicaziun dal num e da l'adressa

Tschertas purschidas sin las paginas pudais Vus utilisar sulettamain, sche Vus inditgais datas persunalas. Per insaquantas purschidas tanschi d'inditgar Vossa adressa dad e-mail, per autras purschidas (p.ex. newsletter, concurrenzas) duvrain nus Voss num/prenum, l'adressa, il numer da telefon e l'adressa dad e-mail. Contribuziuns en purschidas cun funcziun da commentari vegnan publitgadas per regla cun inditgar il prenum, il num, il num d’utilisader ed il lieu da domicil. Las indicaziuns da l’adressa dad e-mail e dal numer da telefon na vegnan betg publitgadas ed èn accessiblas mo a collavuraturs autorisads dad RTR.

Vossas datas persunalas tractain nus tenor la lescha vertenta davart la protecziun da datas. Quai vul dir che RTR s'oblighescha d'utilisar las datas persunalas cun premura e sulettamain per ils intents inditgads.

Da princip ni surdain nus Vossas datas ni las rendain nus accessiblas a terzs. Per trametter nossa newsletter faschain nus diever d'ina software d'ina terza partida. Vus dais il consentiment che Vossas datas pon damai era vegnir segiradas tar questa terza partida per l'intent inditgà. Sche nus collavurain cun furniturs IT americans garantin nus ch'i sa tracta sulettamain d'interpresas che sa chattan sin la glista da Safe Harbor da l'EDÖP.

Vus avais da tut temp la pussaivladad da curreger u stizzar las datas persunalas che Vus avais confidà a nus. Quai pudais Vus far sez en l'administraziun dal profil u che Vus supplitgais nus a scrit da far quai (e-mail, fax u posta).

§ 4 Identificaziun dals visitaders

Da temp en temp pon vegnir memorisadas infurmaziuns sin Voss computer. Cun questas infurmaziuns po Voss computer resp. Vossa rait vegnir identifitgà. Talas infurmaziuns vegnan numnadas «cookies». Quests textfiles memorisads sin Vossa harddisk na cuntegnan naginas datas persunalas, els faciliteschan dentant a Vus d'utilisar nossas paginas d'internet: grazia als cookies pudain nus furnir a Vus ils cuntegns giavischads persunalisads senza che Vus stuais As annunziar a chaschun da mintga nova visita. Vus pudais configurar Voss browser uschia ch'i cumpara in avertiment al monitur avant ch'in cookie vegn memorisà. Vus pudais dentant era da princip refusar tut ils cookies. Tscherts servetschs na pon en quest cas dentant betg vegnir utilisads.

Per mesirar ed analisar l'utilisaziun da la purschida-web da RTR sa serva RTR da Digital Analytix, in servetsch d'analisa da comScore, e da Net-Audit, in product da la Net-Metrix AG. Las infurmaziuns da cookies davart l'utilisaziun da la purschida-web da RTR (inclusiv l'adressa IP respectiva) vegnan transmessas al server da comScore en il Pajais Bass resp. a Net-Metrix AG en Svizra, nua ch'ellas vegnan memorisadas. Per incumbensa da RTR evalueschan ils servetschs d'analisa las infurmaziuns davart Vossa utilisaziun da la purschida-web da RTR ed elavuran rapports correspundents per RTR davart las activitads sin rtr.ch. Ils cookies na pon betg vegnir duvrads per renconuscher Voss apparat da recepziun ordaifer la purschida-web da RTR.

Punctualmain e per in temp limità po RTR er utilisar auters servetschs per analisar e mesirar cun agid da cookies il sa cuntegnair dals utilisaders, cunzunt Google Analytics, in servetsch d'analisa da Google Inc., che memorisescha las infurmaziuns da cookies sin servers en l'USA.

Las datas che vegnan gudagnadas en il rom da l'analisa e mesiraziun na pon betg vegnir utilisadas per identifitgar persunalmain ils utilisaders da la purschida-web da RTR.

§ 5 Forums, blogs e chats

Sin las paginas pudais Vus prender part da forums, chats e blogs interactivs. Remartgai per plaschair che tut las infurmaziuns che Vus tradis en quests secturs èn accessiblas publicamain e pon vegnir duvradas redacziunalmain da RTR. Ulteriuras infurmaziuns davart ils forums, blogs e chats chattais Vus sut la rubrica «Netichetta ed User Generated Content (UGC)».

§ 6 Segirezza

Metter a disposiziun datas persunalas en l'internet è adina collià cun ristgas e nagin sistem tecnologic n'è dal tuttafatg segir da manipulaziuns e sabotascha. RTR emprova da prender mesiras en ina dimensiun raschunaivla per impedir l'access nunautorisà a Vossas datas persunalas e l'utilisaziun nunautorisada u la sfalsificaziun da questas datas e da minimar las ristgas correspundentas.

IV. Disposiziuns finalas communablas

Per tut las relaziuns giuridicas tranter RTR ed ils utilisaders è applitgabel il dretg svizzer. La dretgira cumpetenta exclusiva en cas da dispitas en connex cun las cundiziuns d'utilisaziun e la decleraziun davart la protecziun da datas preschentas è la citad da Cuira cun resalva da dretgiras cumpetentas imperativas.

Cuira, ils 10 da settember 2015