Charas lecturas e chars lecturs

Zoom

Mariano Tschuor, directur RTR 

Bainvegni sin la pagina d’internet da RTR.

 

Jau hai plaschair da salidar Vus en num da nossas collavuraturas e noss collavuraturs. RTR sa porscher 125 plazzas da lavur. Quellas vegnan occupadas da circa 160 persunas che realiseschan di per di in program da radio da 24 uras, emissiuns da televisiun ed ina purschida multimediala sin las trais paginas www.rtr.ch, www.simsalabim.rtr.ch e www.battaporta.ch. Nossa lavur da mintgadi è ina lavur redacziunala, nus producin e distribuin noss products, nus controllain la qualitad da quels e nus faschain regularmain retschertgas tar noss public per eruir sia opiniun davart quai che nus faschain. Era avain nus ina partiziun da communicaziun e da marketing ed ina tala da l’administraziun. Per pudair ademplir noss’incumbensa tenor la concessiun dal cussegl federal, la lescha per radio e televisiun, ils standards publicistics e las directivas da management da la SRG SSR avain nus a disposiziun ina summa annuala da circa 22 milliuns francs.

 

RTR è ina unitad d’interpresa da la SRG SSR cun la sedia principala a Berna. Sco las autras unitads d’interpresa en la Svizra tudestga (SRF), franzosa (RTS), taliana (RSI) e swissinfo (exteriur) ha RTR las medemas obligaziuns ed ils medems dretgs entaifer la SRG SSR, era sche nus essan la pli pitschna unitad.

 

Nossa lavur publicistica realisain nus per la Svizra Rumantscha. Nossa chasa da medias è a Cuira en la Via da Masans 2. Mo nus avain era posts redacziunals en l’Engiadina (Scuol e Samedan), en Surselva (Glion e Mustér) ed en il Grischun central (Savognin). Nus essan dentant era preschents a Berna. Ina giada perquai che la politica naziunala sa fa per gronda part en la chapitala da noss pajais, mo era per mantegnair il contact cun las numerusas persunas rumantschas che vivan en la Bassa.

 

Jau hai la speranza che quai che RTR fa, emetta e publitgescha di per di cuntanschi vus per che vus sajas infurmads bain ed era per che vus possias sa divertir.

 

Na tut quai che nus faschain gartegia. Perquai è vossa opiniun, vossa critica d’impurtanza per nus. Jau intimesch vus da far palais voss'opiniun. Mai cuntanschais vus adina cun scriver in e-mail: mariano.tschuor(@)rtr.ch  u cun telefonar a la centrala da RTR 081 255 75 75.
 

Jau engraziel per vossa stima envers RTR e per vossa fidadadad envers ils programs da RTR.

 

Cordials salids
Mariano Tschuor
Directur RTR