La SRG.R è ina da las quatter societads commembras da la SSR (Societad Svizra da Radio e Televisiun). Ella represchenta la regiun rumantscha en il sectur da radio, televisiun e multimedia e procura cun sia unitad d'interpresa Radiotelevisiun Svizra Rumantscha per ils programs rumantschs.

Sco societad commembra defenda la SRG.R ils interess da la populaziun rumantscha e s'engascha en la publicitad per ils fatgs da l'interpresa. Cun sia purschida da programs dat la SRG.R expressiun a l'identitad da la Svizra ed a la diversitad da sias regiuns. Ils programs servan a l'infurmaziun ed al divertiment, promovan il svilup cultural e permettan ina libra furmaziun da las opiniuns. Cun sias emissiuns contribuescha la SRG.R al mantegniment ed a la promoziun da lingua e cultura rumantscha.

Avais vus interess da radio e televisiun?

Vulais vus savair dapli u schizunt avair da dir insatge tar quai? Lura essas vus al dretg lieu tar la SRG.R!

Sco commember...
- pudais vus inoltrar voss giavischs, vossa critica e vossas propostas
- pudais vus eleger persunalitads en ils differents gremis
- pudais vus daventar commember en in gremi da la SRG.R
- survegnis vus infurmaziuns da radio e televisiun d'emprim maun
- survegnis vus ils products da la butia da radio e televisiun pli favuraivel

...perquai: faschai part!
Commember da la SRG.R po daventar mintginA che discurra rumantsch ubain è collià cun la cultura rumantscha.

Premi SRG.R

Il premi SRG.R vegn surdà dapi l’onn 1960 a persunas cun merits spezials sin il sectur da la cultura e lingua rumantscha. La surdada succeda mintgamai a chaschun da la radunanza generala SRG.R.