Gratulaziuns

L’onn 2014 vulain nus festivar il giubileum da 30 onns gratulaziuns en il Radio Rumantsch ensemen cun vus. Dals 01-01-2014 enfin ils 31-12-2014, 365 dis cun differents regals spezials.

Er durant l’onn da giubileum datti natiralmain da gudagnar mintga di la cuppina. Sa chapescha è quai ina cuppina exclusiva che nus avain fatg bel ed aposta per l’onn da giubileum.

Da nov survegnan durant l’onn 2014 era tut quellas e quels ch’èn precis uschè vegls sco las gratulaziuns ina cuppina dal Radio Rumantsch: Tut ils giubilars da 30 onns che vegnan gratulads cun ina brev, in fax ubain via il formular sin nossa pagina d’internet survegnan posta da nus.

E mintga dumengia han tut ils giubilars che han survegnì durant quell’emna ina gratulaziun en scrit (posta, fax, formular online) la schanza da gudagnar ina turta da nusch pachetada en ina bella stgatla da schember.


Gratulaziuns curtas e surdada da la cuppina ad in giubilar:
glindesdi fin venderdi a las 09.03 / sonda e dumengia a las 10.03
 
Gratulaziuns cun ils giavischs musicals:
mintga di da las 13.00 enfin a las 14.00
 
Gratular pon ins a giubilaras ed a giubilars che han in anniversari radund tranter 5 ed 80 onns en intervals da tschintg onns. Davent dal 80avel anniversari vegnan las giubilaras ed ils giubilars resguardads mintg'onn. Al Radio Rumantsch pudais vus er trametter gratulaziuns per giubileums da nozzas da 25, da 50 e da 60 onns ensi.
 
Vossas gratulaziuns ston esser tar nus il pli tard il di avant l'anniversari respectiv il giubileum a las 10.00.

Gratulaziuns en l'internet

Ultra da las gratulaziuns al radio pudais vus era publitgar las gratulaziuns cun versets u texts pli lungs ed ina fotografia dal giubilar en l'internet. Per l'internet n'è il reglament da gratulaziuns surmenziunà betg valaivel. Qua pudais vus gratular tar tut ils anniversaris e dis da nozzas.