Disc cumpact "L'emprim bitsch - 5 x 5 Impuls"

L'onn 2000 ha il Radio Rumantsch dumandà las duas auturas Rita Cathomas-Bearth e Rut Plouda ed ils trais auturs Silvio Camenisch, Göri Klainguti e Leo Tuor da scriver mintgamai in text tar las suandantas tematicas: "L’emprim bitsch", "L’emprim contact cun l'ester", "L’emprim viadi", "L'emprim di da scola" e "L'emprima sortida".

Quests texts èn publitgads sin il disc cumpact "L'emprim bitsch - 5 x 5 Impuls" ch'ins po cumprar tar Radiotelevisiun Svizra Rumantscha.

Silvio Camenisch

Silvio Camenisch è naschì l'onn 1953 sco frar schumellin a Rueun. El viva cun sia famiglia sco scolast primar e scriptur a Domat. En ses cudeschs tschiffa Silvio Camenisch temas actuals da noss temp. El contribuescha regularmain en periodicas e gasettas.

Rita Cathomas-Bearth

Rita Cathomas-Bearth è naschida l'onn 1949 a Rabius. Ella ha fatg la scola mercantila a Cuira e suenter la scola d'interpretas a Turitg. Ella è maridada e mamma da dus figls, oz viva ella a Cuira. Rita Cathomas-Bearth ha translatà plirs tocs da teater per tribunas sursilvanas e publitgà en gasettas, periodicas e revistas.

Göri Klainguti

Göri Klainguti è naschì l'onn 1945 a Puntraschigna. El viva oz sco pur a Samedan. Picturar e scriver fascineschan el gia dapi si'uffanza. El è maridà ed ha duas figlias.

Rut Plouda

Rut Plouda è naschida l'onn 1948 a Tarasp. Ella ha fatg il seminari da magisters a Cuira. Suenter ha ella dà scola a Savognin ed a Ftan. A Ftan viva ella oz. Ella publitgescha en gasettas, periodicas e revistas.

Leo Tuor

Leo Tuor è naschì l’onn 1959 a Glion. El è creschì si a Rabius e Mustér. Suenter il gimnasi a Mustér suondan studis da filosofia a Turitg e Berlin, e studis da rumantsch, istorgia e litteratura tudestga a Friburg. Gia durant ses studis era el redactur da "la Talina" ed ha dapi lura adina puspè scrit. Oz viva l'autur da renum a Val (Surrein) cun sia dunna ed ils trais uffants.