Duas dunnas che raquintan da lur mintgadi

Dapi l'entschatta da l'onn 2009 fan Bettina Secchi e Rosvita Barenius adina puspè correspundenza en ils Impuls dal Radio Rumantsch. Duas dunnas e mammas che sa raquintan da lur mintgadi, schebain ch’ellas n’èn anc mai sa vesidas.

Bettina Secchi

Bettina Secchi-Fluor ha passentà ses prims 5 onns en Svezia. La scolina, la scola primara e la scola da commerzi ha ella frequentà a Zuoz. Suenter ha ella lavurà in pau qua e là fin ch'ella ha decidì da sa deditgar er professiunalmain a sia gronda passiun, il scriver. Ella ha fatg curs da schurnalissem ed ha lavurà divers onns sco redactura tar il Fögl Ladin a Samedan. Dapi l'onn 1996 è ella en prima lingia mamma e viva uss a Locarno. Sper la famiglia, il scriver, la lectura e la natira è ses engaschi a favur dals indians da l'America dal nord ina part fitg impurtanta da sia vita.

Rosvita Barenius

Rosvita Barenius-Scherrer è creschida si a Trun en Surselva. Suenter la scola media commerziala è ella stada dal 1997 enfin il 2003 moderatura/redactura tar Radio Rumantsch. Oz viva Rosvita Barenius ad Illnau en la Part sura turitgaisa. La musica è fitg impurtanta per ella. Gia dapi sia uffanza chanta ella cun ses fragliuns, oz surtut en il Cantus Firmus Surselva, dentant er en ensembles pli pitschens. Ses um Christian è violinist en la Chasa d'opera a Turitg. Lur uffants sa numnan Laurens, Pierin e Giulietta.