Rita Uffer - la responsabla per ils Impuls

Persunas da differentas professiuns e da differenta derivanza dattan cun lur patratgs davart in tschert tema in Impuls per cumenzar bain il di. Dapi ch'i dat ils Impuls en il Radio Rumantsch è Rita Uffer la redactura dals Impuls. Ella di: "L'onn 1993 sun jau quasi vegnida sfurzada da surpigliar la redacziun dals Impuls. Ord quest sforz è però bainspert daventà fascinaziun, e quella cuntinuescha anc oz, er suenter il 5000avel Impuls."

Tge va per testa sche Rita Uffer pensa als 5'000 texts dals Impuls ed a lur auturas ed auturs?


Rita Uffer:

Jau pens a discurs fritgaivels sur dals texts ed ad interessantas batterladas durant in café suenter la registraziun.

Jau pens al magiel vin alv cun Flurin. El metteva paisa da far viva sin ses texts, suenter ch'el aveva legì mintgin almain trais giadas fin ch'i consteva er per el.

Jau pens a mia trembletga e mias retegnientschas durant l’emprima registraziun cun Hans, il schurnalist ch'jau admirava. Duess jau ristgar d'al dir da stritgar la davosa construcziun moralisanta da ses text. Jau hai ristgà, Hans ha stritgà ed il text
ha gudagnà.

Jau pens a quel vegl scolast e politicher sursilvan che pretendeva da Rina ils Impuls en scrit ch'el legeva lura la saira avant ch'ir a letg.

Jau pens a Jacques e Göri che m’han raquintà ch’ils impuls als hajan purtà dapli resuns spontans che tut lur auter engaschament cultural.

Jau pens a mes surrir zuppà, cura che giuvens auturs han preschentà lur emprim cudesch, perquai che l’emprim pass litterar avevan els fatg cun scriver Impuls.

Ed jau pens a tut ils texts ch’èn vegnids publitgads en gasettas, revistas u ediziuns, texts ch’ils auturs e las auturas han scrit e legì l’emprim sco Impuls. Ils Impuls èn stads definids sco in patratg per cumenzar il di da l’auditurA dal Radio Rumantsch; per mai èn ils Impuls però adina er stads promoziun da litteratura e lectura rumantscha e surtut intimaziun per giuvens e giuvnas da cumenzar a scriver e publitgar.