Viver e lavurar a l'ester

A partir dal 2011 vegnan ils Impuls durant pliras emnas era mintgamai or da metropolas europeicas. Co cumenzan Rumantschs e Rumantschas che vivan a l’ester lur di, tge è auter en las citads ch’èn daventadas lur patria e co èn els s’integrads en la cultura da viver da l’ester?

Quai èn temas dals Impuls che vegnan dad Ursina Guldemond-Netzer, romanista e mamma che viva ad Amsterdam, dad Anna Lee-Famos, dunna da l’art che viva a Londra, Mario Pacchioli, chantautur e student da teater che viva a Paris, Sabina Frei Galgani, schurnalista e mamma ch’è gist turnada da Roma, nua ch’ella ha vivì ils davos onns e da Seraina Caduff, terapeuta d’art che viva dapi endisch onns a Vienna.

Ursina Guldemond-Netzer

Ursina Guldemond-Netzer (1970) è naschida a Savognin. Ella ha studegià romanistica a l'universitad da Friburg. Da preschent viva ella cun ses um Kai e ses dus uffants Sarah ed Alexander ad Amsterdam. Sper sia lavur sco mamma ha Ursina Guldemond-Netzer scrit in text litterar per incumbensa da la Pro Helvetia. 

Anna Lee-Famos

Anna Lee-Famos è naschida l’onn 1938. Ils emprims tschintg onns ha ella vivì en l’Italia, ses geniturs eran “randulins” da Ramosch e Raschvella cun affars a Foggia. Suenter la guerra è la famiglia turnada en l’Engiadina. A Londra è ella davent dal 1961, ha fatg il master en istorgia d’art e germanistica a la London University. Ella dat curs d’istorgia d’art a la City University, dapi blers onns en collavuraziun cun in'universitad americana. Auters lieus da lavur èn King’s College, Sotheby’s, National Gallery, Tate Britain. Anna Lee-Famos è vaiva, ses um era da Shanghai, ella ha dus uffants e trais biadis. Ses hobis: a Londra - teater, tennis, bridge (er „online“) ed a Tschlin - (nua ch’ella è quasi 3 mais l’onn) - ir per bulieus, leger e star patgific.

Mario Pacchioli

L’onn 2009 è Mario Pacchioli i a Paris per frequentar l’academia internaziunala dals arts dal spectacul. Sper la furmaziun d’actur è Mario Pacchioli engaschà d’in teater da renum a Paris per l’entir onn 2011. A quest teater preschenta el ses program "Rispondas". 

Sabina Frei Galgani

Sabina Frei Galgani è creschida si a Scharigna. Ella ha lavurà sco scolasta ed abità en la bassa, en il Grischun ed a Lugano. Dapi 2006 abita Sabina Frei Galgani per 5 onns ad Anguillara ina pitschna citad en il nord da Roma. Ussa stat ella puspè en Svizra a Bubikon (ZH). Entant che las figlias Lucilla e Giada s’acclimatiseschan bain, lascha Sabina Frei anc encrescher in zichel per la vita en l’Italia.

Seraina Caduff

Seraina Caduff (1976) è naschida a Vella en Val Lumnezia. Ella ha fatg il seminari da mussadras da scoletta a Cuira e dà scoletta dus onns a Cumbel/Morissen. L’onn (1999) ha ella bandunà la Svizra ed è ida a Vienna per far la scolaziun da terapeuta d’art. Dapi 2006 lavura ella sco terapeuta d’art en il spital d’uffants S. Anna ed en ses agen atelier a Vienna.