Moderaziun

RTR è conscient: Quest nov program da radio è pretensius e pretenda da quellas e da quels che realiseschan el auta professiunalitad. Mo era per il public è quest program nov ina sfida. RTR sa concentrescha perquai sin moderaturas e moderaturs engaschads e motivads, sin persunalitads qualifitgadas ch’èn ablas da schonglar cun il linguatg, ch’enconuschan l’art dal linguatg e san applitgar quel en scadina situaziun, flexiblamain era en muments da hectica ed era cura ch’i va da declerar tematicas cumplexas a moda simpla e plausibla. RTR ha perquai reducì il team da moderaturas e moderaturs ed ha creà dus teams che vegnan manads dal schefmoderatur: il team da l ‘actualitad e quel dal program accumpagnant.

Novas emissiuns

Cun la midada dal program hai era dà intginas novas emissiuns e rubricas u emissiuns ch’èn vegnidas adattadas.

Il chavazzin dal di - glindesdi fin sonda, 08.40

Tge è in Tsunami propi? E pertge discurran tuts dal secret da bancas, senza savair tge che quai è propi? Il chavazzin dal di dat respostas, respostas sin pleds che fan il gir, respostas sin fenomens e schabetgs actuals. Nus declerain e dain infurmaziuns supplementaras. Per ch’i dettia tar Vus mintgadi in “a-ha”.

Famus e glorius - glindesdi fin venderdi, 10.30

Ha Lara Gut in nov ami? Tgi dal cussegl federal stuess puspè ina giada ir tar il coiffeur? E passenta la famiglia roiala da l’Engalterra sias vacanzas d’enviern era quest onn a Claustra? Famus e glorius, la revista da medias che fa concurrenza als collegas da « Glanz & Gloria».

Kikeri6 - glindesdi fin sonda, 07.40

È Rio de Janeiro la chapitala da la Brasilia? Gea u na? È Dario Cologna oriund da la Val Müstair? Gea u na? In candidat u ina candidata ha da respunder 6 giadas correctamain, 6 giadas aifer 60 secundas, 6 giadas enfin tar il kikeriki final! Da gudagnar datti 6 lottarias da Swisslos ubain rumir l’entir jackpot.

Magazin da cultura - sonda, 10.03 (rep. gli. 20.03)

Palaver - sonda, 12.30 (rep. 20.03)

Emna per emna debatteschan Mariano Tschuor, directur RTR, e Gian Ramming, schefredactur RTR davart in u plirs temas actuals. Cun u senza in giast, ma adina in disput argumentativ, cuntravers e commentond.

Radionovela - glindesdi fin venderdi 10.15 (cumpact dumengia, 07.06 e 07.40)

Si en las muntognas datti ina vischnanca – Surgonda. Ed a Surgonda stattan era ils Caflischs, ina famiglia che viva dapi generaziuns a Surgonda. Ma tgi èn ils Caflischs? E tgi èn ils abitants da Surgonda? Tge èn lur plaschairs e pensiers? E pertge ston els mintgatant rir e cridar en ina? – “Vita capita”: ina radionovela che fa bain e mal al cor.

Vita e cretta - dumengia, 08.06 (rep. 20.03)

L’ura da religiun è ina oasa da tempra religius-meditativa. Cuntegn: verset meditativ-religius, predi/meditaziun, novitads or dal mund da las religiuns, contribuziun davart rituals, dumondas fundamentalas da la vita umana, discussiuns etic-religiusas u ils temas che fatschentan actualmain la differentas baselgias. Ils impuls da la dumengia concludan l’ura.

Campagna per il nov program da radio

La campagna per il nov program da radio cuntegn in QR code (quader entamez). In QR code è ina sort code sco quai ch’ins chatta els en butia sin las chaussas ch’ins cumpra. Ils QR codes na consistan dentant betg mo da lingias gulivas ina sper l’autra mabain da blers quadrels. Quels codes ves’ins per exempel sin bigliets electronics da viafier u bain era sin la decleranza da taglia. Pli e pli savens vegn dentant duvrà quels codes per reclamas u per communitgar links.